Naleraq sinnerlugu Inatsisartunut ilaasortaq Jens NapãtôK’ Naalakkersuisunut allagaq ammasoq nassiussimavaa. Avannaani, nunaqarfinni isorliunerusunilu nioqqutissanik pilersuinerup pitsaannginnera pillugu Naalakkersuisut ullut qulit (10) iluanni tamanut ammasumik akissuteqaqqullugit kaammattorpai.
– Avannaani, nunaqarfinni isorliunerusunilu nioqqutissanik pilersuinerup pitsaannginnera akuersaarsinnaanngilarput. Upernavimmi nioqqutissanik annertuumik amigaateqarpugut, pingaartumillu inerititanik naatitanillu pilersuineq isornartorsiornaqaaq. Tamanna innuttaasut ulluinnarni inuunerannut sunniuteqarpoq, ilaqutariillu pitsaasunik assigiinngiiaartunillu nerisaqarsinnaanerat killilerneqarpoq, oqarpoq Jens NapãtôK’.
– Innuttaasut pissutsit taamaannerat suli qanoq sivisutigisumik akuersaaginnassagaat Naalakkersuisut isumaqarpat? Pissutsillu aaqqinneqarnissaat kia akisussaaffiginiarpaa? aperivoq.
– Nunatsinni sumiiffiit imminnut ungasipput, assartuinermilu atugassarititaasut ilungersunartuullutik. Tamanna nalunngilarput. Taamaattumik nioqqutissanik pilersuineq pilersaarusiorluarneqartariaqarpoq. Ajornartorsiuteqartoqalissagaluarpallu qanoq iliuuseqartoqarnissaa piareersimaffigineqartariaqarpoq. Silap pissusaa nunattalu isorartussusia nioqqutissanik amigaateqattaarnermut utoqqatsissutigineqartuaannassanngillat, oqarpoq Jens NapãtôK’.
– Upernavimmi, nunaqarfinni isorliunerusunilu allani innuttaasut nunatsinni innuttaasut allat assigalugit nioqqutissanik patajaatsumik pitsaasumillu pilersorneqarnissamut pisinnaatitaaffeqarput. Ulluinnarni nioqqutissanik nalinginnaasunik kiisalu paarnanik naatitanillu nutaanik pisiniarsinnaanerput sumi najugaqarnerput apeqqutaalluni aalajangerneqassanngilaq. Peqqissuseq inuuniarnikkullu atukkat pitsaanerulernissaat pillugit oqalunneq naammanngilaq, ilaqutariit tamatumunnga pisariaqartitaminnik ulluinnarni pisiniarsinnaanngippata, oqarpoq.
– Pisiniarfiit, nioqqutissanik pilersuisut, assartuisut Naalakkersuisullu akornanni kina sunut akisussaasuunersoq ersarissuusariaqarpoq. Ulluinnarni pilersuinermik akisussaasut suliassaminnik naammassinninnissaminnut akisussaatinneqartariaqarput. Pilersuinerli ingerlalluanngikkaangat Naalakkersuisut akuliunnissamut politikkikkut akisussaaffeqarput. Naalakkersuisut ajornartorsiutit uteqattaartut iliuuseqarfiginagit isiginnaartuuginnarpata, pissutsit taamaannerat iliuuseqannginnermikkut akuersaaginnassavaat. Tamanna uanga akuersaarsinnaanngilara, oqarpoq Jens NapãtôK’.
Piumasaqaatit sisamat
Allakkamini Jens NapãtôK’ Naalakkersuisut ersarissumik akissuteqarlutillu tigussaasunik iliuuseqarnissaat piumasaraa:
- Ajornartorsiutit pillugit nassuiaat: Sooq Upernavimmi illoqarfinnilu nunaqarfinnilu allani eqqugaasuni nioqqutissanik pilersuineq taama amigaateqartigaa? Pilersaarusiornermi suut amigaatigineqarpat, kinalu akisussaasuua?
- Nioqqutissanik amigaateqarnerup piaartumik aaqqiiviginissaanut pilersaarut: Ulluinnarni nioqqutissat pisariaqartinneqartut pissarsiarineqarsinnaanissaat qulakkeerniarlugu maanna qanoq iliuuseqartoqartorpa? Inerititanik naatitanillu pisiniarsinnaaneq pitsaanerulersinniarlugu qanoq iliuuseqartoqartorpa?
- Pilersuinissamut pilersaarut ataavartumik atuussinnaasoq: Naalakkersuisut nioqqutissanik pilersuinerup patajaannerulernissaa nioqqutissallu pitsaassusiisa qaffannissaat qanoq qulakkeerniarpaat? Nioqqutissat tikinnissaat kinguaattoorpata qanoq iliuuseqartoqarnissaa Naalakkersuisut qanoq piareersimaffiginiarpaat?
- Innuttaasunut ersarissumik paasissutissiineq: Innuttaasut nioqqutissat suut amigaataanersut, nioqqutissat nutaat qaqugu tikinnissaat ilimagineqarnersoq ajornartorsiutillu aaqqinniarlugit qanoq iliuuseqartoqarnersoq ilisimatinneqartariaqarput.
Akissummi erseqqissumik saqqummiunneqartariaqarput qanoq iliuuseqartoqassanersoq, qaqugu pissanersoq kinalu sunut akisussaasuunersoq.
– Pissutsit malinnaaffigineqartut oqaatigineqaannarnissaat naammanngilaq. Innuttaasut najukkaminni pisiniarfimmi nioqqutissat pissarsiarineqarsinnaasut pitsaanerulersimanerat malugisinnaasariaqarpaat. Pilersuinermik akisussaasut suliassaminnik naammassinninngippata, Naalakkersuisut iliuuseqartoqarnissaa piumasarisariaqarpaat. Naalakkersuisut iliuuseqanngippata, iliuuseqannginnertik namminneq akisussaaffigisariaqarpaat, oqarpoq.
– Avannaani, nunaqarfinni isorliunerusunilu innuttaasut ajornartorsiutimik ilungersunartutut isigineqarnissaat naatsorsuutigisinnaasariaqarpaat. Nioqqutissanik pilersuinerup ingerlalluarnissaa piumasaraarput. Pilersuinerlu ingerlalluanngikkaangat Naalakkersuisut akisussaaffimminnik tigusisarnissaat piumasaraarput, oqarpoq Jens NapãtôK’.
