Arferup neqaanit tarajortikkanit nannullu neqaanik burgeriaqqanit saarulliup amianik chipsilianut. Tasiilami suliniummi najukkami nerisassat takornarianut qanoq nutaanik misigisassaqartitsisinnaanersut illoqarfiullu inuusuttuinut periarfissanik nutaanik ammaassisinnaanersut sammineqarput.
Tasiilami takornariaqarnermi nerisatigut misigisassat annertunerusumik inissisimalissapput. Tamanna Kommuneqarfik Sermersuup suliniutaani »Food in Tourism«-imi siunertaavoq. Suliniummi oktobarimi workshopertoqarpoq, iganermik unammisitsisoqarluni inuusuttullu peqatigalugit igasoqarluni.
Suliniut kommunip inuussutissarsiornermut immikkoortortaqarfianit aallartinneqarpoq, sumiiffimmilu nerisassatut pissarsiarineqarsinnaasut aallaavigineqarlutik. Kommuni naapertorlugu nerisatigut misigisassat takornariat Tunup pinngortitaanut kulturianullu qaninnerulersissavaat.
Arferup neqaanit tarajortikkanit nannup neqaanik burgeriaqqanut
Inunnguaq Hegelund Arctic Food By I-meersoq ulluni sisamani workshopertitsivoq. Nerisassiornermut ilitsersuutit 16-it nassatarai, ilaatigut arferup neqaanik tarajortikkanik nannullu neqaanik burgeriaqqanik ilitsersuutitaqartut.
Workshopip naggasernerani peqataasut nerisassiatik tamanut ussassaarutigaat, nerisassiallu atortullu pillugit oqaluttuartarlutik. Aggertut aamma nerisassanik ussiisinnaatitaapput.
Tasiilami kantinami iganermik unammisitsisoqarpoq. Tallimat unammipput, Inunnguaq Hegelundilu najukkami eqqartuussisut pingasut peqatigalugit nerisassianik naliliisuulluni. Kommuni suliniummik aallartitsisuuvoq aningaasaliisullu pingaarnersaralugu, Pilersuisorlu Starkilu akissarsiassanik tunissuteqarlutik.
Kommunip inuussutissarsiornermut immikkoortortaqarfiani immikkut siunnersorti Susanne Bisgaard Rasmussen naapertorlugu nerisatigut misigisassat takornarianut neqeroorutinik amerlanerusunik pilersitsisinnaapput najukkamilu suliffeqarfiit ineriartortitsinissaannut periarfissiillutik.
– Najukkami nerisassat takornariaqarnermi atorluarneqarnerunissaannut periarfissarpassuaqarpoq, oqarpoq.
Inuusuttut saarullinnik pisaqqaanik igapput
Suliniummi aamma inuusuttut illuanni Igdlomi suliffeqarfimmilu inuttut akisussaassusilimmik ingerlatsiviusumi Siu-Tsiumi inuusuttut peqataatinneqarput. Kommunip Tunumi takornariaqarnermut ataqatigiissaarisuata Anna Burdenskip aaqqissugaanik inuusuttut Inunnguaq Hegelund peqatigalugu igapput.
Royal Greenland saarullinnik pisaqqaanik tunissuteqarpoq. Inuusuttut ilaatigut saarulliup nerpiinik, saarulliup niaquinik kissarsuummi uutanik, saarulliup amianik chipsilianik kiisalu mayonnaise-imik namminneq sanaamik misileraapput. Aamma ilinniarnissamut periarfissanik, ilaatigut igasunngorniarnermik, paasitinneqarput.
Anna Burdenskip suliniut najukkami suliniutinik inunnillu ataatsimoortitsinissamut periarfissatut aamma isigaa.
– Najukkami nerisassat assigiinngitsorpassuartigut atorneqarsinnaanerisa nerisatigullu pissanganartunik misigisassanut atorneqarsinnaanerisa takutinnissaat pingaaruteqarpoq, oqarpoq.
Najoqqutaq: Kommuneqarfik Sermersooq, 11. novembari 2026.
