Charlothe Petersen Mørkhøj Sisimiuneersuuvoq, maannalu illoqarfimmut uterluni. Atugarissaarnermut pisortatut suliassanik isumaginninneq pitsanngorsarniarpaa suleriaatsillu eqaannerulersinniarlugit.
Charlothe Petersen Mørkhøj 1. septembari 2026 Qeqqata Kommuniani atugarissaarnermut pisortatut sulilerpoq. Kommunip ilisarititsinerani oqaluttuarpoq sulisut qaammatit tamaasa suliamut tunngasunik siunnersoqatigiinnissaannut piffissaliisarnissani kissaatigalugu.
Siunnersoqatigiinnermi ilaatigut innuttaasunik attaveqateqarneq, inatsisinik atuineq kiisalu isumaginninnermi suliamut tunngatillugu naliliisarneq sammineqararsinnaapput. Aamma kommunip sulinini qanoq aaqqissorsinnaaneraa misissorniarpaa, suliassat aaqqissuussaanerusumik suliarineqartalernissaat anguniarlugu.
Suliassanik isumaginnittumiit immikkoortortaqarfimmi pisortanngortoq
Charlothe Petersen Mørkhøj ilinniagaqalernermini Sisimiunit nuuppoq. 2011-mi isumaginninnermi siunnersortitut ilinniakkani naammassivaa, tamatumalu kingorna Kommuneqarfik Sermersuumi meeqqat inuusuttullu pillugit suliassanik isumaginnittutut sulilerluni. Kingusinnerusukkut Atuarfik Hans Lynge-mi isumaginninnermi siunnersortitut sulivoq.
2018-imi Aalborg Universitetimi isumaginninnermi sulineq pillugu kandidatitut ilinniakkani naammassivaa. Tamatuma kingorna Odensemi Kalaallit Illuanni ukiuni sisamani isumaginninnermut siunnersortitut sulivoq. Tassani Danmarkimi najugallit kalaallit siunnersortarpai, ilaatigut oqartussanut attaveqarnissaanni ikiortarlugit.
2022-mi Kalaallit Nunaannut uterami Ilisimatusarfimmi isumaginninnermi siunnersortinngornianik ilinniartitsilerpoq. Oktobari 2025-mi Ilisimatusarfimmi immikkoortortaqarfimmi pisortanngorpoq.
