Mike Keen, Kalaallit Nunaata kitaani sineriak kalaaliminernik kisimik inuussuteqarluni qaannamik ipulluni angalaarfigimmagu ilisarisimaneqalersimasoq, maannakkut Ilulissani ataatsimoorluni aqunneqartumik neriniartarfiliorusuppoq – kalaallimik igasulerlugu, INUILI-miit ilinniartuuteqartillugu nerisassallu sassaalliutissat qilalugaminernimit Wellingtoneqartillugu.
Isumassarsiaq qaannamiitilluni isumassarsiarisimavaa. Igasoq angalatoorlu Tuluit Nunaanneersoq akunnerpassuarni kitaata sineriaa avannamut ingerlaarfigalugu eqqarsaasersoruusaarsimavoq, isumassarsiallu ataatsip uteqqiaffigiinnalersimallugu.
»Kalaallit Nunaanni takornarissat kalaaliminernut ilisarititsisoqarpianngilaq. Akunnittarfimmi puujutamik kalaaliminernik imaqalaartunik kisimi sassaalliisoqarsinnaavoq; mattak, aalisakkallu panertut aamma raajat – allanik naamik. Sinneri nudlit, pizza aamma burgerit Europami sumiluunniit pisinnaasagut sassaalliutigineqartarput,« Apersorneqarnermini taamak oqaaseqarpoq.
Tamanna allanngortikkusuppaa. Mike Keen Ilulissani neriniartarfimmi sulivoq – illoqarfik takornariaqarfiunerpaasarmat najugarisassatut toqqarsimavaa – neriartortut kamillarlutik Kalaallit angerlarsimaffiannut isertarnermisut, issiaqatigiillutik nerisassarpassuarnik tapas-itut sassaalliutigineqartunik nereqatigeerujoorfigisinnaasaat.
Nerisassat sassaalliutigineqarsinnaasut kalaaliminiussapput europamiutullu nerisassiarineqarsinnaassallutik: qilalugaq-Wellington nersutaatinnagu, umimmak sivisuumik siataq, neqaa aqingaarami saarnganut atasinnaajunnaarsimasoq, kujataanit ruuat qeqqussanik taratsikkat, qaleralik niviarsianik akusaq – puisinillu, qilalukkamik, umimmammik aamma tuttumik pølsiliat.
»Europami nunat tamarmik pølsiliarisartakkatik ileqqorisartakkatillu tulluusimarutigisarpaat. Orsukkaanik, soorlu puisi qilalugarlu, kalaallisut pølsiliorsinnaagatta tusaamasanngortussamik,« oqarpoq nangillunilu, aamma kalaalimerngit, assersuutigalugu puisi suaasat mattallu aamma allanngortinneqaratik sassaalliutigineqarsinnaassasut.
Sinneqartoorutit illoqarfimmiitiinnarneqassapput
Keenip iluarsartuullugu pilersaarusiaq pisuunngortitsisinnaanngitsoq isertugaatiginngilaa – aamma nammineq pisuunngussutigiunnarnagu oqaatigaa.
»Aningaasanik katersinissara pikkoriffiginngisaannarnikuuvara, uungalu tunngatillugu aamma aningaasannanniassutiginissaa soqutiginagu. Sinneqartoorutit inuiaqatigiinnut piniartunut aalisartunullu tuttassapput, taamaasillutik nioqqutiminnut akit naapertuuttut pissarsiarisassallugit.«
Neriniartarfik, pilersaarut malillugu, nerisassaannarnut tunngassuteqassanngilaq: umiarsuit takornariartaatinik angalasunut neriffissaq, saqqummiisarfissaq, filminik isiginnaartarfissaq aamma Kalaallit eqqumiitsuliaat – aamma pisiniarfeeraq, takornarissat nerisassanik nerisassiornermut ilitsersuutitalinnik, taqussat unnuiffigisamut nassarneqarsinnaasut pisiassaallutik.
Tuluk nuimasoorusunngitsoq. »Tuluullunga inuit iliuusissanik ilinniartikkusunngilakka. Kalaallimik igasutut pisortaqassaaq, aamma aqutsisoqarluni nunaqavissuinnarnik sulisoqassaaq.« Narsami INUILI ilinniartuuteqarnissamut tunngatillugu oqaloqatigilereersimavaa, taamaasilluni Nunani Avannarlerni igasuunissamut ilinniartut misilittagaqartalernissaat isumannaarneqarluni – Keen nammineq KOKSimi, neriniartarfiup Savalimmiuniinnerani, sulisuusimavoq, aamma New Yorkimi, New Zealandimia amma Tuluit Nunaanni imerniartarfiutimini sulisimalluni.
