Avannaata Kommuniata ilinniartitsisuni attatiinnarsinnaanngilai, nutaanillu atorfinitsitsinissani ajornakusoortillugu. Kommuni nammineq naapertorlugu tamanna atuarfinni pitsaassutsimut kingunerluuteqarpoq.
Avannaata Kommuniani ilinniartitsisut soraartarput, inissiat kommunimit atugassiissutigineqartut naammattumik pitsaassuseqannginnerat pissutigalugu. Tamanna kommunip aningaasaqarnikkut kvartalikkaartumik nalunaarusiaani atuarneqarsinnaavoq. Nalunaarusiaq kommunalbestyrelsip tallimanngornermi septembarip 25-anni suliaraa.
Inissianik amigaateqarneq aamma nutaanik atorfinitsitsinissamut ajornartorsiutaavoq. Kommuni allappoq sulisussaaleqineq pissutigalugu atuarfiit pisortaat ilinniartitsisullu suli atorfeqartut suliassanik amerlanerusunik isumaginnittariaqartut, tamannalu ”atuarfinni pitsaassutsimut sunniuteqassasoq”. Ulloq naallugu atuarfimmut nutaamut suli sulisoq atorfinitsinneqanngilaq.
Ilinniartitsisussaaleqineq pissutigalugu kommuni taartaasartunut sulisunullu ilinniarsimanngitsunut nalunaaquttap-akunnermusialinnut aningaasartuuteqarneruvoq. Nalunaarusiaq naapertorlugu utaqqiisaasumik ineqartitsinermut nutserinermullu aningaasartuutit missingersuutinit annertuumik qaffasinnerupput.
Atorfiit inuttaqanngitsut naapertorlugit missingersuutit
Atuarfiit missingersuutaat nalinginnaasumik ukiut tamaasa qaffanneqartarput. Ukiumut 2027-mut missingersuutit qaffanneqarnatillu appartinneqanngillat. Kommuni allappoq atorfiit inuttaqanngitsut amerliartornerat pissutigalugu missingersuutit atuarfiit aningaasartuutivii naapertorlugit suliarineqarsimasut. Ilinniartitsisut IMAK aqqutigalugu isumaqatigiissutaanni akissarsiat qaffaatissaat suli ilanngunneqanngillat.
Angerlarsimaffimmi meeqqanik paarsisarnermut aamma tamanna atuuppoq. Oqaatsuni Upernavik Kujallermilu angerlarsimaffimmi meeqqanik paarsisarnermut aningaasaliissutit atorneqanngillat, naak meeqqat utaqqisut allattorsimaffianniikkaluartut, meeqqanik paarsisussaqannginnera pissutigalugu.
Kommuni Uummannami, Ikerasammi Upernavimmilu ilinniartitsisunut inissianik nutaanik sanaartortitsivoq. Pilersaarutit naapertorlugit ukioq manna naammassineqassapput. Aappaagumut aamma Ukkusissani, Qaarsuni Siorapalummilu ilinniartitsisunut inissialiornissamut aningaasanik immikkoortitsisoqarsimavoq.
Ataatsimiinnermi tassani illuatungiliuttut Ilulissani atuartut angerlarsimaffiata inigisimasaanik inissianngortitsinissamik siunnersuuteqarput, ilaatigut ilinniartitsisunik atorfinitsitsinissaq oqinnerulersinniarlugu. Amerlanerussuteqartut illup ulloq unnuarlu paaqqinnittarfimmut allanngortinneqarnissaa taarsiullugu toqqarpaat.
