Kommuni Kujallermi kommunalbestyrelsi Majoriaq-sullissivinni pingasuusuni nutaamik sulianut pisortaqalernissamut atorfimmik pilersitsissalluni aaliangiivoq. Tamanna aaliangerneqarsimavoq, ukioq kingulleq atorfiit 15-it peerneqarsimaneri peqqutaallutik. Kommunip aamma IT-mut pisortatut atorfik siornatigut atorunnaarsinnikuusaraluani pilerseqqissimavaa.
Kommune Kujalliup 2025-mi suliffissarsiortunut ikiorsiissutinut aamma suliffeqarnermut tunngasunut 25 mio. kr. missaat atorsimavai. Aningaasat ukiumut aallartittussamut isertitassat atortitassallu naatsorsuutaat 16 mio. kr. Missaanniissimapput. Ingerlatsivik malillugu kisitsisit takutippaat, suliffissarsiortut amerliartornerat ataatsimoorluni suliniuteqarnermik pisariaqartitsisoq.
“Aningaasatigut unammillernartut Majoriap ulluinnarni ingerlatsineraniinngilaq, suliffissarsiortunulli ikiorsiissutiniillunilu suliffeqarnermut tunngasssuteqartuniilluni”, suliami saqqummiinermi ingerlatsivik taamak allassimavoq.
Aamma suliassat suliarinissaannut inuttassat ikinnerulersimapput. 2025-mi sipaarniarnermi Majoriap sulisuni 15-it annaasimavai, sammineqartumilu ataatsimoorussamik aqutsisoqarsimanani. Qaqortumi, Narsami Nanortalimmilu sullissiviit immikkut aqutsisoqarput.
Pingasunngormat kommunalbestyrelsi taamaattumik aaliangiivoq, aaliangersimasumik sullissivinni pingasuni aqutsisussamik suliamut pisortaqalernissamut atorfimmik pilersitsissalluni. Atorfik 2027-miit ukiumut 776.000 kr. naleqarpoq, pisortartaassarlu siusinnerpaamik ulloq 1. novembari atorfinitsinneqarsinnaalluni. Suliamut pisortap suliassaa siulleq tassaavoq, suliffissarsiortut amerlanerit sulilersissallugit imaluunniit ilinnialersissallugit, taamaasilluni ikiorsiissutinut aningaasartuutit unikaallatsinneqassammata.
Atorfik nutaaq aqutsisutut atorfiuvoq, atorfiillu 15-it atorunnaarsinneqarnikunut taarsiutaanani. Ingerlatsivik aamma isumaqarpoq, ajornartorsiut sullissisut amerlinerinnaatigut iluarsineqarsinnaanngitsoq. Politikkerit maannamiit ukiumut sisamariarlutik suliffissarsiorneq pillugu ilisimatitsiisassapput, ilaatigut inuusuttut 30 ataallugit ukioqartut suliffeqanngitsut imaluunniit ilinniagaqanngitsut pillugit ilisimatitsiisassallutik.
Ataatsimiinnermi aamma kommunalbestyrelsi aaliangiivoq, nutaamik IT-mut, digitalinngorsaanermut aamma isumannaallisaanermut tunngasunik ilisimatitsiisartussatut akisussaasussamik pisortatut atorfimmik pilersitsissalluni. Siornatigut kommuni IT-mut pisortaqarsimagaluarpoq, atorfilli atorunnaarsinneqarsimavoq, IT-mullu tunngasut aningaasaqarnermut qullersaqarfimmiilersimallutik. Ingerlatsivik malillugu aaqqiissutip kommunip pisariaqartitaanik matussusiisimanngilaq. Atorfiup nutaap pilersinneqarnera qanoq aningaasartuutaatigissanersoq suli naatsorsorneqarsimanngilaq.
