Naalakkersuisut pingasut sisamanngornermi ullaap tungaani Narsap napparsimmaviani sulisut naapippaat. Pulaarnermi peqqinnissaqarfimmi sulisussanik pissarsiniarnermi sulisunillu sulisoqaannarnissami unammilligassat oqallisigineqarput.
Jens-Frederik Nielsen, Anna Wangenheim aamma Mariane Paviasen Jensen pulaarnerminni sulisut ulluinnaat unammilligassaallu pillugit paasisaqarput. Naalakkersuisut Siulittaasuata Naalakkersuisoqarfia tusagassiorfinnut nalunaarummi taama allappoq.
– Ernumassutisi pimoorullugit tiguagut. Peqqinnissaqarfimmi sulisussanik pissarsiniarnermi sulisunillu sulisoqaannarnissami unammilligassanut atasinnaasunik aaqqiissutissarsisariaqarpugut, tusagassiorfinnut nalunaarummi allassimavoq.
Naalakkersuisut pingasut sulisut innuttaasunut kiffartuussinerannut qujapput. Naalakkersuisoqarfik naapertorlugu sulisut atugassarititaasut ajornakusoortut atorlugit sulisarput. Naalakkersuisut aamma erseqqissarpaat sulisut piginnaasaasa avataanniittunik suliakkerneqassanngitsut.
