Imigassamik matusigallarnerup kingunerisaanik angerlarsimaffimmi eqqissiviilliornerit nakuusernerillu ikileriangaatsiarnerat Kalaallit Nunaanni politiit maluginiarpaat, tamanna meeqqat toqqissisimanerannut atugarissaarnerannullu pingaaruteqartumik sunniuteqarluarsinnaasoq, politiit pisotaanerat Bjørn Tegner Bay naliliivoq.
Kalallit Nunaanni Politiit kisitsisaataasa takutippaat Kommune Kujallermi imigassamik matusigallarneq pitsaasumik malitseqartoq. Kisitsisimmi takutippaat nalunaarutiginninnerit amerlasususaat malunnatilimmik ikileriarsimasut, pingaartumik angerlarsimaffinni eqqissiviilliornernut nakuusertoqarneranullu tunngasut.
Sapaatip akunnerini 39-mi 40-milu eqqissiviilliornerit pillugit nalunaarutiginninnerit 13-it nalunaarsorneqarsimapput, sapaatillu akunnerani 41-mi 42-milu (imigassamik matusinerup kingorna) sisamaannanngorsimallutik. Nakuusernerit pillugit nalunaarutiginninnerit sisamasimasut sapaatip akunnerani 41-mi 42-milu ataasinnanngorpoq, aalakoortullu pillugit nalunaarutiginninnerit sisamaasimasut sapaatip akunnerini 41-mi 42-milu ataasinnaq nalunaarutigineqarsimalluni.
– Pissutsit piffissami sivikitsumi taamaallaat malinnaavigineqarsimanerat pissutigalugu inerniliinissamut suli siusippallaarpoq. Taamaakkaluartoq politiit malunnaatilimmik misigaat imigassamik matusigallarneq pitsaasumik kinguneqartoq. Tamannami politiit nalunaarsuinermi kisitsisaataasa ersarissumik takutippaat, politiit pisortaat Bjørn Tegner Bay oqarpoq.
Meeqqat ilaqutariillu toqqissisimanerulernerat
Politiit angerlarsimaffimmi eqqissiviilliornerit nakuusernerillu ikileriarsimanerat erseqqissaatigaat. Angerlarsimaffimmi eqqissiviilliornerit nakuusernerillu meeqqanut sakkortuumik kinguneqartarput, annilaanganermik toqqissisimannginnermillu misigiffiusarlutik.
– Politiit naliliinerat aallaavigalugu angerlarsimaffinni eqqissiviilliornerit ikileriarsimanerat meeqqat akornanni toqqissisimanerulernermik nassataqarpoq, Bjørn Tegner Bay oqarpoq.
Pitsaaliuinissamut periarfissat pitsaanerulerput
Nalunaarutiginninnerit ikileriarsimanerannik aallaaveqartumik politiit suliassanik allanik suliaqarnissamut periarfissaqalerput. Matumani ilaatigut suliat uninngatikkallakkat naammassillugit suliarinerinut, atuarfinnut nunaqarfinnullu ornigunnernut kiisalu kommunefogedinik attaveqarnermut piffissaq atorneqarluni.
Politiit pisortaanerata erseqqissarpaa inaarutaasumik inerniliinissamut suli siusippallaartoq, kisiannili imigassamik matusigallarneq ataatsimut isigalugu politiinut pitsaasumik sunniuteqarsimasoq.
– Atuarfeqarfimmit, isumaginninnermit aamma peqqinnissaqarfimmiit paasissutissat tigusimasavut ilanngukkaanni, taava uagut naliliinerput naapertorlugu inerniliussaq erseqqippoq: Imigassamik matusigallarnerup kinguneranik pinerluuteqarnerit ikilinerat aamma toqqissisimanerulerneq pitsaasumik sunniuteqarput – pingaartumik meeqqat eqqarsaatigalugit, Bjørn Tegner Bay oqarpoq.
