Upernavimmi qaleralittat ikileriarsimapput, pisassiissutilli amerleriarsimallutik. Nalilersuinerup nutaap takutippaa aalisartut aperineqartut 51 procentii aalisarfimminni qaleralinnik ikinnerusunik takusaqartartut.
Upernavimmi qaleralinniartut 2026-mi Namminersorlutik Oqartussat apeqqutinik immersugassaannik akissuteqarsimasut affaannit amerlanerulaartut aalisarfimminni aalisakkanik ikinnerusunik takusaqartarput.
51 procentit akipput qaleralinnik ikinnerusunik peqartoq. 2025-mi misissuinermi taamatut akissuteqartut 43 procentiupput. Peqatigisaanik 39 procentit aalisakkat amerlassusaat allannguuteqanngitsutut nalilerpaat, sisamaasullu procentit aalisakkat amerlanerusutut nalilerlugit.
Tamanna Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup sinerissap qanittuani qaleralinniarnermi atuisut ilisimasaat pillugit nalilersuinerani erserpoq.
Aalisartut takusartagaasa saniatigut nalunaarusiami Upernavimmi pisat ikileriarsimanerat takuneqarsinnaavoq. Nalunaarusiaq naapertorlugu pisat 2023-mi 7.335 tonsiusut 2024-mi 5.331 tonsinut, 2025-milu 4.320 tonsinut ikileriarsimapput. Tamanna 2023-miit 2025-mut 41 procentit missaannik ikileriarneruvoq.
Piffissami tassani pisassiissutit 9.300 tonsiniit 10.444 tonsinut amerleriarsimapput. Akerlianik uumassusilerituut siunnersuinerat 6.070 tonsiniit 5.801 tonsinut appariarsimavoq.
Taamaalilluni pisassiissutit pisallu akornanni assigiinngissut annertusiartorsimavoq.
Nalunaarusiami pingaartumik pisassiissutit inunnut ataasiakkaanut tunniunneqartartut niuerutigineqarsinnaasullu, IOK-t, atorluarneqarnerisa appariarsimanerat tikkuarneqarpoq. Taakkua atorluarneqarnerat 2023-mi 52 procentiusoq 2025-mi 31 procentimut appariarsimavoq. Umiatsiaararsortunut ataatsimoorussamik pisassiissutit atorluarneqarnerat 97 procentiniit 79 procentinut appariarsimavoq.
Aammattaaq sumiiffimmi qaleralinniartut ikileriarsimapput. Nalunaarusiaq naapertorlugu 2023-mi 382-it qaleralinniartuusimapput, 2025-milu 344-ullutik — tassa aalisartut 38-nik ikileriarsimallutik.
Nalilersuinerup pisat ikileriarnerannut suna pissutaanersoq aalajangersumik oqaatigineq ajorpaa. Erseqqissarneqarpoq pisassiissutit atorluarneqarnerisa allanngoriartornerat ilaatigut aalisartut aalisarnermik ingerlatsisut amerlassusaannut, aalisarnerup annertussusaanut sumiiffinnilu aalisarnikkut atugassarititaasunut atatillugu isigineqassasoq.
Misissuinerup kisimiilluni aamma aalajangiiffigisinnaanngilaa qaleralit stockiat ikileriarsimanersoq. Aalisartut akissutaat aalisarfimminni takusartagaannut tunngasuupput, uumassusilerituullu siunnersuinerannut aalisarnermilu paasissutissanut nalunaarsorneqarsimasunut ilassutaassallutik.
Nunatsinni tamarmi aalisartut 289-t 2026-mi apriilimi apeqqutinik immersugassanik misissuinermut peqataapput. Aperineqartut 19 procentii akissuteqarput. Naalakkersuisoqarfiup taamatut misissuititsinera aappassaanik ingerlanneqarpoq. Taamaattumik nalunaarusiami erseqqissarneqarpoq inernerit suli piffissami sivisuumi allanngoriartornernik aalajangersaanermut atorneqarsinnaanngitsut.
