Allannguineq akerleriinnikkut anguneqarsinnaanngilaq, oqaloqatigiinnikkulli anguneqarsinnaalluni.
Narsarsuarmi sakkutooqarfeqalissagaluarpat isertussanngilarput ukiuni kingullerni tusarliunneqartartut siorasaarutaasartullu amerikamiunut tatiginninnermik sanngiillisitsisimammata. Tatiginninneq taanna atsiornerinnakkut utertinneqarsinnaanngilaq. Sanarfeqqittariaqarpoq – iliuuseqarnikkut, oqaloqatigiinnikkut minnerunngitsumillu peqataatitsilluarnikkut.
Uatsinnut tunngavigisaq erseqqilluinnarpoq:
Nothing about us without us (Peqataanngikkutta eqqartorneqassanngilagut).
Kommunitsinnut inoqarfitsinnullu aqqutissat tassaapput ataqqinnineq suleqatigiinnerlu.
Taamaammat naatsorsuutigisavut erseqqilluinnarput:
Narsarsuarmiut toqqissisimassapput. Sakkutooqalissagaluarpat tappavanimiut toqqissisimajunnaarsinneqassanngillat nalornilersinneqassanatilluunniit.
Narsarsuup soqutigisai attatiinnarneqassapput. Narsarsuaq nunap assingani sumiiffiinaanngilaq. Inoqarfitta ilagaat, tulluusimaarutigisatsinnik inulik, oqaluttuassartalik, inuussutissarsiutilik nunaqqatigiilillu.
Kommune qinikkallu akuutinneqassapput. Ineriartorneq pissaaq Kommune Kujalleq, kommunalbestyrelse Narsarsuarmi nunaqarfimmi aqutsisut qanimut suleqatigalugit. Najukkami qinersisartut aalajangiinernut ilaassapput – kingusinnerusukkut ilisimatinneqaannaratik.
Najugaq ataqqineqassaaq. Pinngortitaq, avatangiisit, savaatillit akianiittut inuillu allat tamaani najugaqartut inuussutissariortuusullu ataqqineqassapput.
Innuttatta pisinnaatitaaffii assortuussutigineqassanngillat. Innuttatta pisinnaatitaaffii navianartorsiortinngisaannassavavut, tamannalu aallaqqaataaniit erseqqissumik oqaatigereerusuppara.
Aamma erseqqilluinnassaaq sakkuutoqarneruleraluarpat Kommune Kujalliup kommunitut suliassai pisussaaffiilu tammarnavianngimmata.
Paarlattuanik suliassat annertuneruliinnariaapput.
Narsarsuarmi sakkutooqarnerulissappat aamma eqqaamiuminut sunniuteqartussaanerat erseqqilluinnartumik paasineqartariaqarpoq. Inuiaqatigiinnut iluaqusersuutit, upalungaarsimaneq, ineqarneq, pilersuineq, avatangiisit, angallanneq kiisalu kommunip sullissinerit piumasaqaateqarfigineqalissapput.
Oqaloqatigiinneq ammaffigaarput. Suleqatigiinneq ammaffigaarput. Aaqqiissutissanik nassaarnissamut ammavugut.
Suleqatigiissagaannili ataqqeqatigiittariaqarpoq.
Narsarsuaq Kommune Kujallermut ilaavoq.
Narsarsuaq najugaqarfigaarput.
Narsarsuullu ineriartortinneqarnera tamaani najugaqartut peqatigalugit pissaaq.
Malene Vahl Rasmussen,
Kommune Kujallermi borgmesteri.
