Aviisi.gl aamma Tusarfik Kalaallit Nunaanni innuttaasunut Danmarkimilu kalaallinut sullitanut siammasinnerusumik angusaqarnissaq siunertaralugu suleqatigiilerput.
Aviisi.gl aamma Tusarfik tamarmik immikkut sullitaqarlutik tusagassiorfiupput nutaat. Aviisi.gl Kalaallit Nunaat tamakkerlugu digitalimik paasissutissiisarfiuvoq. Tusarfik kalaallinut Danmarkimiittunut internetsikkut nutaarsiassanut tusagassiorfiuvoq.
Aviisi.gl aamma Tusarfik Atlantikoq qulaallugu atassusiisinnaapput aamma oqaluttuanik paasissutissanillu attuumassuteqartunik Kalaallit Nunaanni innuttaasunut kalaallinullu Danmarkimiittunut anngussisinnaallutik. Tusagassiivinnit taakkunanit suliniut siulleq suleqatigiissutigineqartussaq tassaavoq Kalaallit Nunaanni Suliffissat, tassani Kalaallit NUnaanni suliffeqarnermi periarfissat ataatsimoortinneqarlutillu ersarissarneqassallutik.
– Tusarfimmi tusagassiornermik misilittakkavut kulturimillu paasinninnerput atorlugit tusagassiornermik pitsaasunik suliaqarsinnaavugut suleqatitsinnit iluaqutigineqarluarsinnaasunik. Ilutigitillugu suleqatigiinnikkut suliatsinnik Tusarfiup nittartagaa atorlugu siammartereqataasinnaavugut. Tusarfimmi inuit oqaluttuaat suulluunniit sullitanut attuumassuteqarlutillu ilisarinnilersitsisunngortissinnaanerat nukittuffigaarput, Paornánguak Helene Kleist, Tusarfimmi akisussaasutut aaqqissuisoq oqarpoq.
– Aviisi.gl nuna tamakkerlugu atugassatut tusagassiorfiuvoq, kisianni Kalaallit Nunaat nunap killeqarfianut killeqanngilaq. Kalaalerpassuaqarpoq Danmarkimi najugaqartunik nunatsinnilu pisunik malinnaalluartunik, tassanilu Tusarfiup sullitai inissisimaneralu uatsinnut ilalersuutaalluarput. Suleqatigiinnissarput taamaammat isumatusaarneruvoq suliagummi pitsaanerulerlutillu oqaluttuat attuumassuteqartut siaruarternerusinnaalissavagut. Kalaallit Nunaanni Suliffissat assersuutaalluarpoq. Tassani inuit, suliffeqarfiit Kalaallit Nunaannilu suliffissaasinnaasut takutissavagut – aamma kalaallinut Danmarkimiittunut angerlamut uterusussinnaasunut. Suliniutit taamaattut tassaapput ataatsimoorutiginerisigut angusaqarfiunerusinnaasut, Lasse Christensen, Aviisi.gl-imi pisortaaneq oqarpoq.
Tusarfik marsimi 2026-mi Kalaallit Nunaata Issittullu ukkatarineqarluarnerata nalaani kalaallinut Danmarkimiittunut oqaaseqartarfissatut pilersinneqarlunilu saqqummiunneqarpoq. Inuiaqatigiit, kulturi naalakkersuinerlu pillugit nutaarsiassat aamma kalaallit qallunaallu kulturiisa assigiinngissutaat assigiissutaallu pillugit oqaluttuat atorlugit ataatsimoornermik misigilernissamut kulturikkullu paaseqatigiinnissamut Tusarfik iluaqutaaniarpoq.
Aviisi.gl Kalaallit Nunaanni digitalimik nutaamik tusagassiorfeqalernissaq anguniarlugu maajimi 2026-mi saqqummerpoq. Nutaarsiassat, oqallinnerit, innuttaasunut paasissutissat suliffiillu pillugit oqaatsit tallimat atorlugit inuit, suliffeqarfiit inuiaqatigiillu Aviisi.gl-imit qaninnerulersinniarneqarput paasissutissallu attuumassuteqartut Kalaallit Nunaanniittunut tamanut pissarsiarineqarsinnaalersillugit.
Paasisaqarnerunissamut attavissat:
Lasse Christensen, Aviisi.gl-imi pisortaaneq, e-mail lasse@gmg.gl.
Paornánguak Helene Kleist, Tusarfimmi akisussaasutut aaqqissuisoq, e-mail muku@tusarfik.dk.
