Nivi Olsenip (Demokraatit) marlunngornermi ullaakkut nalunaarutigaa ilinniartitaanermut, kultureqarnermut, timersornermut ilageeqarnermullu naalakkersuisutut tunuarluni. Aqaguaniunngitsoq, ataasinngornermili Atassutip naalakkersuisooqatigiinnit tunuarniarluni nalunaarutigaa.
Nivi Olsenip marlunngornermi ullaakkut Facebookikkut nalunaarutigaa Naalakkersuisunut ilaasortatut tunuarluni.
Facebookimi allakkamini suleqatigisimasani qutsavigai, meeqqat atuarfiannik suliani, uummateqarfiginerakkani, immikkut eqqaallugu. Anguniakkani suli amerlasuut angorusussimagaluarlugit, pingaarutilinnik aalajangeeqataasimanini tulluusimaarutigalugu allappoq.
– Nikisitsinerilli aamma akeqartarput. Tulluusimaarlunga matukkut anissuunga, Nivi Olsen allappoq.
Sooq tunuarnerluni erseqqissumik oqaatiginngilaa. Aamma kina taartigissallugu nalunaarutiginngilaa.
Atassut ataasinngornermi naalakkersuisooqatigiinnit tunuarpoq
Atassutip ataasinngornermi nalunaarutigaa naalakkersuisooqatigiinnit tunuarluni. KNQK-mut tapiissutit pillugit suliap kingorna partiip Nivi Olsen naalakkersuisutut tunuaqqusimavaa. Olsenip ataasinngornermi itigartitsissutigaa tapiissutinut atatillugu inatsisinik unioqqutitsisimaneragaaneq.
Atassummeersup Maritha Brobergip marlunngornermi Nivi Olsenip Facebookimi allagaa siammarterpaa. Olsenip ilinniartitaanermut tunngasuni suliniutai nersualaarpai, nunarpullu sullilluarsimagaa qujassutigalugu.
