Atassutip naalakkersuisoqatigiinnit tunuarnini nalunaarutiginnagu ilisimatinneqarnissani Naalakkersuisut siulittaasuata naatsorsuutigisimavaa. Ulloq taanna siusinnerusukkut partiit 2027-mut aningaasanut inatsisissamut isumaqatigiissut atsioqatigiissutigaat.
Atassutip Naalakkersuisut naalakkersuisoqatigiillu qimallugit tunuarnerluni ataasinngornermi novembarip 9-anni nalunaarutigaa. Naalakkersuisut siulittaasuat Jens-Frederik Nielsen (D) Facebookimi allappoq aalajangiineq uggorigitsigu, tunuarnerullu qanoq ingerlanneqarnera pakatsissutigalugu.
Nielsenip oqarnera naapertorlugu Atassutip nammineq oqaatigaa tunuarnissaq sapaatiummat aalajangiunneqareersoq. Taamaattumik naalakkersuisoqatigiinni suleqatit ilisimatinneqareersimanissaat naatsorsuutigisimavaa, ingammik ataasinngornermi Siumut peqatigalugu 2027-mut aningaasanut inatsisissamut isumaqatigiissut atsioqatigiissutigimmassuk.
– Uannut politikkikkut suleqatigiinneq aamma tatiginninnermik aammalu immitsinnut ammasumik pissuseqarfiginninnermik tunngaveqarpoq, pingaartumik aalajangiinerit ajornakusoortut aalajangiiffigineqartillugit, allappoq.
Atassut suli suleqatigiumavaa
Jens-Frederik Nielsenip Atassut suleqatigiinnerminnut qujassuteqarfigaa. Partiillu isumaqatigiinngissuteqartarsimagaluarlutik nunamut pingaarutilinnik ataatsimoorlutik aalajangeeqataasimanerat erseqqissarpaa. Atassut Inatsisartunilu partiit allat akisussaaffimmik tigusinissamut peqataarusuttut suli suleqatigiumallugit allappoq.
– Innuttaasunut pisussaaffeqarpugut eqqissisimaneq, patajaassuseq aammalu ersarissumik siunnerfeqarneq pilersissallugit, aamma politikkikkut suleqatigiinneq ajornakusoortunngoraluaraangalluunniit, allappoq.
