Arnat innarliinerit takussaasunngortippaat. Nalunaarusiat nutaat naalagaaffiup Danmarkip inuit pisinnaatitaaffiinik unioqqutitsisimaneranut akisussaaffia pillugu apeqqusiipput. Danmark akisussaaffimmik tigusinngippat, suliap attuumassuteqanngitsumik suliarineqarnissaa Naleraqp piumasaraa.
Spiralilersuisimanermut suliaq arnanit niviarsiaqqanillu namminneq piumassuserinngisaminnik naartunaveersaaserneqarsimasunit aallartippoq. Taakku ilisimatinneqaqqaaratik, piumassuserinngisaminnik akuersitinneqaratillu naartunaveersaaserneqarput.
Taamatut pineqarnermikkut timaat, ilaqutariittut inuunerat siunissaallu innarlerneqarput.
Ilaasa anniarneq, kanngusunneq apeqqutillu akissutissarsineqanngitsut inuunerup annerpaartaani nammappaat. Arnat oqaluttuatik inuiaqatigiinnut oqaluttuarinissaat pisussaaffiginngilaat. Inuiaqatigiilli tusarnaarnissaat pisussaaffigaat.
Sapiissuseqarlutik nipangersimaneq kipitippaat. Oqaluttuarisaanermut tunngasunik misissuineq, pisortatigoortumik utoqqatsernerit ajunngitsorsiassarsititsinissamullu aaqqissuussineq arnat annertuumik naapertuilluanngitsumik pineqarsimanerannik pisortatigoortumik akuersaarnerupput.
Arnat oqaluttuaasa innarliinerit takussaasunngortippaat. Maanna arnat ataasiakkaat qanoq innarlerneqarsimanerat, aamma ataatsimut pineqarsimanerat misissorneqassapput.
Ataatsimoortumik periuseq aamma Danmarkip akisussaaffia misissorneqassapput
Taamaattumik innarliinerit nakorsap napparsimasullu akornanni pisutut ataasiakkaatut taamaallaat isigineqassanngillat. Inuit-arnat niviarsiaqqallu amerlasuut assingusumik innarlerneqarput, ingammik peqqinnissaqarfik naalagaaffiup Danmarkip akisussaaffigigallarmagu.
Taamaattumik ataatsimoortumik periuseq naalagaaffiullu Danmarkip akisussaaffia misissorneqassapput.
”Arnat Inuiaat Kalaallit ilaattut isiginerisigut pingaaruteqassusiat annikillisinnianngilarput. Arnat ataasiakkaat ataqqineqarnissaat ataatsimoortumik periutsimik imaluunniit naalagaaffiup Danmarkip akisussaaffianik toqqorteriniarnermut atorneqassanngilaq,” Naleqqami siulittaasoq Pele Broberg oqarpoq.
Inuit pisinnaatitaaffiinik unioqqutitsinerit pillugit nalunarusiaq siulleq
Immikkut ilisimasallit suleqatigiissitaat inuit pisinnaatitaaffii pillugit ataatsimik nalunaarusiornissamik suliakkerneqarpoq. Sulinerup ingerlanerani peqataasut isumaqatigiinngilerput. Tamanna ajuusaarnartumik kinguneqarpoq. Immikkut ilisimasallit suleqatigiissitaata nalunaarusiaa kisimi ilisimatusarnermi periutsinut akuerisaasunut naapertuuttutut nalilerneqarpoq.
Immikkut ilisimasallit suleqatigiissitaata nalunaarusiaa saqqummersitarlu alla tamarmik atuarneqarsinnaapput. Kisianni inissisimanerat, siunertaat suliatigullu pitsaassusiat assigiinngillat.
Rashida Manjoop nalunaarusianik naliliinermini oqaatigaa immikkut ilisimasallit suleqatigiissitaata nalunaarusiaani suliakkiissummi apeqqutit arfineq-marluk akineqartut. Saqqummersitaq immikkutittoq allatigut iluaqutaasinnaavoq, kisianni inuit pisinnaatitaaffii pillugit suliakkiissut akineqanngilaq ilisimatusarnermilu periutsinut akuerisaasunut naapertuutinngilaq.
Politikkikkut eqqartuussisoqassanngilaq pinngitsuutitsisoqaranilu
Imarisaa qanorluunniit ikkaluarpat, nalunaarusiaq eqqartuussinerunngilaq. Immikkut ilisimasallit suleqatigiissitaata nalunaarusiaa Danmarkimut eqqartuussutaasinnaanngilaq.
Naleraq isumaqarpoq politikkikkut eqqartuussinissaq pinngitsuutitsinissarluunniit iluaqutaanngitsoq.
Danmarkip inuiannik nungusaaneq pillugu isumaqatigiissut naapertorlugu naalagaaffittut akisussaaffia pillugu eqqartuussut pituttuisoq Naalagaaffiit Peqatigiit Nunat Tamalaat Akornanni Eqqartuussiviannit, ICJ-mit, taamaallaat aalajangerneqarsinnaavoq. ICJ-p eqqartuussutaa qanorluunniit ikkaluarpat Naleraq ataqqissavaa.
Danmarkip isumaqatigiissummik unioqqutitsisimanini nammineq nassuerutiginngippagu, naalagaaffiup allap suliaq eqqartuussivimmut suliassanngortittariaqarpaa. Kalaallit Nunaat suli naalagaaffiunngimmat nammineq taamaaliorsinnaanngilaq.
”Naalakkersuisut angalanernut nunanullu allanut attaveqarnermut 9 millionit koruunit sinnerlugit atorsimavaat. Maanna takussavarput attaveqatigiinneq aamma ikinngutitaartornermik kinguneqarnersoq, suliap misissornissaanut peqataarusuttut suliaq eqqartuussivimmi suliarineqarsinnaaqqullugu suleqataarusuttunik pilersitsisimanersut,” Pele Broberg oqarpoq.
