Saffiorfimmi, Smede Ø-mik aamma taaneqartartumi, eqqakkanik tigooraavik talittarfittalik nutaaq pilersinneqassaaq. Avannaata Kommuniani kommunalbestyrelsip kommunimut pilersaarummut tapiliussaq normu 66 akuersissutigaa.
Tigooraavik nutaaq atulerpat Upernavimmi eqqaavissuaq maanna atorneqartoq atorunnaarsikkiartorneqassaaq, illoqarfimmilu eqqakkanik isumaginninneq pitsaanerulersinneqassalluni.
Tigooraavimmi eqqakkat ikuallanneqarsinnaasut naqinneqarlutillu poortorneqassapput. Taakku ilaannikkut “skumfidusinik” taaneqartarput. Tamatuma kingorna eqqakkat umiarsuarnut usilersorneqarlutik Sisimiuni ikuallaavimmut EU-mit akuerisaasumut assartorneqassapput.
Eqqakkanik assartuineq Avannaata Kommuniata eqqagassalerinermut pilersaarutaa 2023-2035 naapertorlugu ingerlanneqassaaq. Pilersaarut taanna nuna tamakkerlugu eqqagassalerinermut pilersaarummik malinnippoq.
Kommuni naapertorlugu tigooraavik nutaaq Upernaviup attaveqaasersuutaanik nukittorsaassaaq, illoqarfiullu eqqagassaannik avatangiisinut pitsaanerusumik mianerinnittumillu isumaginninnissamut sinaakkutinik pitsaanerusunik pilersitsissalluni.
Kommunimut pilersaarummut tapiliussaq aamma Avannaata Kommuniata nittartagaa pillugit uani annertunerusumik atuarsinnaavutit.
