Maajimi Naalakkersuisut nalunaarutigaat nutserineq naatsorsuutigeqqaakkamit pisariummat, unammillernarmat, piffissartornarmallu nalunaarusiat tamanut saqqummiunneqarnissaat kinguaattoortoq. Nalunaarusiat taakkua marluk inatsisitigut qaffasissumik suliaapput, nalunaarusiallu kalaallisut, qallunaatut, tuluttullu tamanut saqqummiunneqarnissaat Naalakkersuisunut pingaaruteqarluni. Tamanna pillugu oqaatsini taakkunani pingasuni nalunaarusianik peqqissaarullugu pitsaassutsimik qulakkeerinissaq pingaartinneqartorujussuuvoq.
Taassuma saniatigut nalunaarusiat maajimiilli pitsaassutsikkut naliliiffigineqarput, kingornalu immikkut ilisimasalinnit iluarsiiffigineqarlutik. Taakkua aamma nutserneqarlutillu pitsaassutsikkut qulakkeerneqartariaqarnikuupput.
”Nalunaarusiat taakkua marluk tamanut saqqummiunneqangajalerput, tamanullu saqqummiussinissamut inaarutaasumik ulluliussaq qanittumi nalunaarutigissallugu naatsorsuutigaarput. Erseqqissaatigeqqissavara, kinguaattoorneq annertuumik nutserinermik aamma nutsikkanik pitsaassutsikkut qulakkeerinermik, tassungalu atatillugu nalunaarusianik pitsaassutsikkut naliliinermik patsiseqarmat. Tamanut saqqummiussinissaq annertuumik pingaartinneqarpoq, suliallu imaannaannginnera patsisaalluni arnat eqqugaasimasut ataqqillugit peqqissaarullugu tamanut saqqummiussisoqartariaqarluni.” Taamak oqarpoq Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen.
Naalakkersuisut naatsorsuutigaat, nalunaarusiat taakkua marluk tamanut saqqummiunneqarnissaannut inaarutaasumik ulluliussaq piaartumik nalunaarutigisinnaassallugu.
