Innarluutillit pillugit suliassaqarfimmut fagchefimik angusaqarluarusussusilimmik aammalu ineriartornermik soqutigisalimmik pissarsiorpugut
Siunissami Kommune Kujallermi innarluutilinnut suliniuteqarnerup nukittuumik tunngavissiorneqarnissaanut peqataagit
Suliassaqarfimmi illit ilinniakkatigut piginnaasavit aammalu aqutsisinnaassutsivit inuit innarluutillit iluaqutigisassaanni siuttoorusuppit? Aamma suliffimmi pitsaassutsimik, inatsisitigut isumannaatsuunermik aammalu atugarissaarnissamik qitiutitsisumik ineriartortitsinissamut kajumissuseqarpit? Taava imaassinnaavoq illit tassaasutit fagchefitaassarput.
Kommune Kujallermi innarluutillit pillugit suliassaqarfik immikkuullarissumik allanngoriartortinneqarpoq. Meeqqanut aammalu inunnut innarluutilinnut qullersaqarfimmik nutaamik pilersitsisoqarnikuuvoq, maannalu suliassaqarfimmik piujuartitsisinnaanerusumik suliatigullu piginnaassuseqarfiunerusumik tunngaveqartumik nukittuumillu pilersitsineq ingerlatileruttorparput. Fagchefitut sulinermi sammiviup ilusilersornissaani qitiusumik inissisimaffeqassaatit – tassa maannakkorpiaq ingerlatsinermi aammalu siunissami aaqqiissutissatigut ineriartortitsinermi.
Suliassaqarfik ineriartortoq – isumassarsianik aammalu aqutsisoqarnissaanik inissaqartitsisoq
Fagchefitut kommune tamakkerlugu oqartussaasoqarfik, ikiuisartoqatigiit, najugaqaqatigiiffiit, najugaqarfissatut neqeroorutit, sulliviit illersukkat aammalu katsorsaavik akisussaaffigilissavatit. Aqutsisooqatigiit qitiusumik akuuffigilissavatit aammalu qullersaqarfimmi aqutsisut aammalu Isumaginninnermi Aqutsisoqarfimmiit utaqqiisaagallartumik suleqatigineqartut qanimut avitseqaqatigisassallugit.
Makkunatigut periarfissaqassaatit:
- Suliassaqarfimmi nutaamik aaqqissuunneqaleruttortumi sammiviliineq aamma erseqqissunik sinaakkusiineq aammalu aaqqissugaanernik suleriaatsinillu sammiviliineq
- Suliassat isumagineqartarnerinik aammalu allannguinernik nukittorsaaneq, taamaaliornikkut innuttaasut piffissaq eqqorlugu tamakkiisumik isiginnittaaseqartumik tapersersorneqarsinnaaqqullugit
- Sulisunik aqutsisunillu ineriartortitsineq, taamaalilluni suliatigut piginnaasaqarneq, atugarissaarneq aammalu suleqatigiinneq tassaaleqqullugit aaqqissugaanermi tunngaviit
- Ingerlatsiviit aammalu avataaniit suleqatigisartakkat akornanni ataqatigiissaarineq aammalu innarluutillit pillugit suliassaqarfimmik nukittuumik ataqatigiissumillu pilersitsineq
- Pilersaarusiukkamik ineriartortitsinermut aammalu aningaasatigut aqutsinermut peqataaneq, taamaalilluni suliassaqarfik siunissami aalajaatsooqqullugu
Illit pingaarnertut suliassatit tassaapput:
Toqqissisimanartumik ilinniarsimarpalaartumillu ingerlatsisoqarnissaata qulakkeernissaa
Illit tassaassaatit ingerlatsinermik ataqatigiissaarisoq aammalu innuttaasut suliatigut nukittuunit sullinneqarnissaannik inatsimmillu tunngaveqartumik sulisoqarnissaanik qulakkeerinnittartussaq. Sammiviliineq ulluinnarnilu eqqissisimasumik aammalu pitsaassusilimmik sullissisoqarnissaa illit qulakkeertassavat, kommunilu tamakkerlugu assigiiaartumik aalajangiisarlutit.
Ineriartortitsinissaq aammalu aaqqiissutissanik nutaanik pilersitsarnissaq
Nutaanik sinaakkusersuinikkut, ingerlaasiliornikkut suleriaasiliornikkullu ineriartorneq siumut ingerlatissavat. Suliniutit pilersaarusiukkat suliassaqarfimmik kivitsisussat siuttuuffigisassavatit, uppernarsaasiorluni takussutissiortoqartarnissaa qulakkeertassavat aammalu sulianik ingerlatsisarneq pitsanngorsarlugu.
Inunnik aqutsinissaq aammalu suleqatigiinnermik nukittorsaanissaq
Tassaassaatit aqutsisoq qanilaartoq, sulisunik ineriartortitsisoq – qullersaqarfimmi avataaneersullu suleqatigisarnerinut tunngatillugu – suleqatigiinnikkut attaveqatigiinnernik nukittuunik pilersitsisartoq. Ingerlatsivimmi pisortaq aqutsisullu sinneri qanimut suleqatiginerisigut tamakkiisumik takunnissinnaanermut, isumalluutitigut ataqatigiissaarinermut suliffimmilu ulluinnarni pisariaqartinneqartorpassuit pingaarnersiornissaanni suleqataasassaatit.
Ilinniit naatsorsuutigisavut:
Aqutsisumik suliatigut nukittuumik, angusaqarusussuseqartumik suliassaqarfimmilu aaqqissuussaaleruttortumi periarfissarsiorsinnaasumik pissarsiorpugut. Akisussaaffeqarnermik, allannguisinnaanermik suleqatiginninnermillu nuannarisaqartuussaatit – aamma siunissami ukiorpassuarni atorsinnaasunik pilersitseqataarusussuseqassaatit.
Takorloorparput illit tassaasutit:
- Suliatigut attuumassuteqartunik ilinniarsimasuusutit, assersuutigalugu isumaginninnermi siunnersortitut assingusumilluunniit ilinniarsimasoq.
- Innarluutillit pillugit suliassaqarfimmi, qullersaqarfimmi suliniutinilluunniit sulinermik misilittagaqartutit
- Aqutsinikkut annertuumik misilittagaqartutit – aqutsisunik aqutsinermik misilittagaqartutit
- Suliffimmi ineriartortumi sammiviliisinnaasoq, eqqissilluni aaqqissuussamik sulisoqarnissaanik qulakkeerinnissinnaasoq
- Suleqatiginnillaqqissoq suleqatigiiaallu assigiinngitsut akornanni attaveqatigiittarnernik pilersitsisinnaasoq
- Pilersaarusiullaqqissoq aammalu aningaasaqarnermut tunngasunik suliaqarsinnaasoq pingaarnersiuisinnaasorlu
- Suliatigut aalajangiinerit aalajaatsumik suliatigut tunngavilersuilluni aalajangiisinnaassusilik – aamma ajornakusooraangata
- Marluinnik oqaasilik (kalaallisut/danskisut), tamannali piumasaqaataanngilaq.
Uagut neqeroorutigisinnaasavut
Atorfittaanni suliatit pingaaruteqassaqaat. Atorfiit aqqutigalugu suliassaqarfiup ineriartortinneqaleruttortup iliuuseqarfiginissaanut periarfissaqassaatit, illillu isumassarsiatit aqutsinerillu siunissami innarluutillit pillugit suliniuteqarnermut sammiviliisinnaavoq. Aqutsisooqatigiit nutaat tunniusimasullu qanimut imminnut suleqatigiillutik ingerlatsivimmik nukittuumik piujuartitsisumillu ingerlatsisut suleqatigilissavatit. Tamaniillu pingaarnerpaaq: suliffimmi inunnik inuillu inuuniarnermikkut atugaannik qitiutitsilluinnartumi illit sulinerit inuiaqatigiinnut tunngatillugu annertuumik pingaaruteqassaaq.
Akissarsiat atorfininnermilu atugassarititaasut atorfininnerup nalaani Kalaallit Nunaanni Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut naapertorlugit ingerlanneqassapput.
Atorfimmut atatillugu inissiamik innersuussisoqarsinnaavoq, tassunga atatillugu malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput, aammattaaq atorfininnermut atatillugu angalanermut pigisallu nuunnerinut akiliussisoqarsinnaavoq – aammalu malittarisassat atuuttut naapertorlugit minnerpaamik ukiuni pingasuni atorfeqareernerup kingorna – soraarnermut atatillugu angalanermut pigisallu nuunnerinut akiliussisoqarsinnaalluni.
Sukumiinerusumik paasisaqarusuppit?
Paasissutissat sukumiinerusut ingerlatsivimmi pisortaagallartumut Paninnguaq Kleemannimut saaffiginninnikkut pissarsiarineqarsinnaapput, e-maileraa: pkln@kujalleq.gl
Isumagisassartai:
Qinnuteqaat ilinniarsimasanut paasissutissartalik, siornatigut suliffigisimasanut paasissutissat, ilinniarsimanermut uppernarsaatit assilineqarneri, pillagaasimannginnermut uppernarsaat, sulisitsisorisimasaniit oqaaseqaatit assigiissaallu PDF-filitut immiunneqassapput aammalu kommunip nittartagaatigut kingusinnerpaamik 28-07-2026 tiguneqarsimassallutik.
MALUGINIARUK: Qinnuteqaatinik pappiliaasunik tigusineq ajorpugut imaluunniit mailikkut tigusineq ajorluta. Atorfimmut inuttassarsiuussinermut allagarsiussaq elektroniskiusoq atorlugu qinnuteqaatinnik nassiussinissannik qinnuigaatsigit.
”Innuttaasut peqqinnerulernissaat qitiutillugu Kommune Kujalliup kommunimi suliffeqarfiit tamaasa pujortarfiunnginnissaat atuutilersippaa. Tamanna 1. januar 2018-imiit atuutilerpoq. Paasissutissat sukumiinerusut sulisoqarnermut immikkoortortaqarfimmiit pissarsiarineqarsinnaapput”.
