Paamiuni innuttaasut najukkami tunisassianik ineriartortitsinissamut, assassornermik suliaqarnissamut namminersorlutillu suliffeqalernissamut siunnersorneqarnissaminnut nutaamik katersuuffeqalerput.
Kommunalbestyrelsip aalajangiineratigut kommunip illu B-106 Mikisoq pisiaraa, tassanilu Nutaaliorfik ammarneqarluni.
Illu najukkami isumassarsianut, pilersitsiffiusumik sammisaqarnernut inuussutissarsiornikkullu periarfissanut nutaanut sinaakkutaassaaq. Innuttaasut ilaatigut amminik, mersornermik allanillu assassornermik suliaqarsinnaassapput.
Najukkami tunisassiortut aamma tunisassiaminnik illumi saqqummersitsisinnaallutillu tuniniaasinnaassapput. Isumassarsiat pilersitsiffiusut ilaat piffissap ingerlanerani tunisassianngorsinnaallutillu namminersorlutik suliffeqarfinnik pilersitsinissamut tunngaviliisinnaassasut neriuutigineqarpoq.
Illorput isumassarsiorfigineqarpoq
Illu Illorput isumassarsiorfigalugu aaqqissuunneqarpoq. Kommunip init atortussallu atugassanngortippai, atuisullu namminneq sammisassanik imarisaanillu pilersitseqataassallutik.
Nutaaliorfik aamma ileqqunik tunngaveqartumik assassornermik ilisimasaqarnermik eriagisaanissamut ineriartortitseqqinnissamullu atorneqassaaq. Tassani assassornermik misilittagallit nutaamillu isumassarsiallit naapissinnaassapput, kinguaariillu soqutigisallillu assigiinngitsut akornanni ilisimasaq avitseqatigiissutigineqarsinnaassalluni.
Iværksætterinut siunnersuineq
Kommunip inuussutissarsiornermut immikkoortortaqarfiata illu namminersorlutik suliffeqarusuttunut allanullu inuussutissarsiornermik soqutiginnittunut aaqqissuussinernut atussavaa.
Sammisassat ilaatigut takornariaqarnermut, tunisassianik ineriartortitsinermut namminersorlunilu inuussutissarsiornermut tunngassapput. Aamma suliffeqarfimmik mikisumik qanoq aallartitsisoqarsinnaanersoq ingerlatsisoqarsinnaanersorlu pillugit siunnersorneqarsinnaassaaq.
Kommunip anguniagaraa Nutaaliorfik Paamiuni inuussutissarsiornermut, kulturimut sunngiffimmilu inuunermut ilaasunngussasoq. Kommuni naapertorlugu illup qanoq pingaaruteqartigilernera ilaatigut innuttaasut qanoq atuilernerannit sammisassanullu qanoq peqataatiginerannit aalajangerneqassaaq.
Assi: Visit Nuuk/Gerth Lyberth
