Qeqqata Kommunia oktobarip aallaqqaataani ilikkarsarnermut siunnersortimik atorfinitsitsivoq. Taassuma suleqatigiinneq kiisalu meeqqerivimmiit atuarfimmut, ilinniagaqaqqinnermut sulilernissamullu ikaarsaariarnerit nukittorsassavai.
Meeqqat inuusuttullu peroriartornerminni ilinniarnerminnilu ataqatigiinnerusumik periarfissaqartinneqassapput. Qeqqata Kommuniata Ilinniartitaanermut Immikkoortortaqarfiani ilikkarsarnermut siunnersortimik atorfinitsitsinermi tamanna anguniagaavoq, kommuni ilisimatitsivoq.
Ilikkarsarnermut siunnersortip nutaap, kommunimit Pia-mik saqqummiunneqartup, meeqqeriviit, meeqqat atuarfii, MISI-p Majoriallu akornanni suleqatigiinneq ilaatigut tapersersussavaa.
Suliaq neqeroorutit assigiinngitsut akornanni ikaarsaariarnerit ataqatigiinnerulernissaannut kiisalu meeqqat inuusuttullu ilikkagaqarnissamut, atugarissaarnissamut ineriartornissamullu periarfissaasa nukittorsarnissaannut iluaqutaassaaq.
Atorfimmut aamma ilaapput perorsaanikkut ineriartortitsineq kiisalu ilikkagaqarnermik suliniutinik, soorlu Kivitsisa-mik, tapersersuineq. Suliffeqarfiit akornanni ilisimasanik avitseqatigiinneq ataatsimoorlunilu aaqqiissutissanik ineriartortitsineq suliassani pingaaruteqassapput.
Paasissutissarsiffik: Qeqqata Kommunia
