Napparsimasut 180-it missaanniittut seeqquleritinnissamut piaarnerusumik suliaritissapput, inuillu 400-t missaanniittut inalugarsuakkut perulunnartumik nappaateqarsimasut malitseqartitsilluni misissorneqassapput. Naalakkersuisut aamma naartusut RS-virusimut akiuussutissamik kapitittarnissaannik neqeroorfiginiarpaat.
Peqqissutsimut inunnullu innarluutilinnut naalakkersuisoq Anna Wangenheim Facebookimi opslagimi taama ilisimatitsivoq.
Naalakkersuisoq naapertorlugu Naalakkersuisut ataatsimoorlutik peqqinnissaqarfimmi neqeroorutinik pitsanngorsaasussanik arlalinnik suliniuteqarnissaq isumaqatigiissutigaat. Aningaasalli suli inaarutaasumik immikkoortinneqanngillat, suliniutit Inatsisartuni Aningaasaqarnermut Akileraartarnermullu Ataatsimiititaliamit akuerineqaqqaartussaammata.
Amerlanerusut suliaritillutillu misissorneqassapput
Pilersaarut naapertorlugu napparsimasut 180-it missaanniittut seeqquleritinnissamut utaqqisut 2027-ip naannginnerani aggersarneqarlutillu suliaritissapput. 2026-mi 2027-milu qanoq amerlatigisut suliaritissanersut opslagimi ilisimatitsissutigineqanngilaq.
Inuit 400-t missaanniittut inalugarsuakkut perulunnartumik nappaateqarsimasut malitseqartitsillunilu misissorneqarnissaminnik pisariaqartitsisut ukiut taakku marluk ingerlaneranni piaartumik misissorneqassapput.
Naalakkersuisut aamma naartusut RS-virusimut akiuussutissamik kapitinnissaannik neqeroorfiginiarpaat. Akiuussutissap meeraaqqat perulullutik napparsimmavimmut unittariaqalernissaannut aarlerinaat annikillisissavaa.
Qaratsakkut ajoqusersimasut sungiusarteqqinneqassapput
Pilersaarutit aamma inuit qaratsakkut ajoqusersimasut immikkut sungiusarteqqinneqarnissaannik imaqarput.
Inuit annertuumik pisariaqartitsisut qulit missaanniittut qaammammik ataatsimik sivisussusilimmik sakk intensiviusumik sungiusarteqqinneqarnissaat naatsorsuutigineqarpoq. Anna Wangenheim naapertorlugu peqataasut inuunerinnerulernissaat piginnaasaminnillu ineriartortitsinissamut attassiinnarnissamullu ikiorneqarnissaat siunertaavoq.
Suliniutit ataqatigiissaarneqarnissaannut sulisunut atugassat aamma amerlineqassapput.
Pitsaassutsimut immikkoortortaqarfimmik pilersitserusupput
Naalakkersuisut aamma peqqinnissaqarfimmi pitsaassutsimut immikkoortortaqarfimmik pilersitsinissamut sulineq aallartinniarpaat.
Immikkoortortaqarfiup ilaatigut naammagittaalliuutit napparsimasullu isumannaatsuunissaat suliarissavai. Opslagi naapertorlugu innuttaasut peqqinnissaqarfimmik atuisutut misilittagaat pitsaassutsip ineriartortinneqarnerani aaqqissuussaanerusumik ilaatinneqassapput.
Anna Wangenheimip suliniutit piffissami sivisunerusumi aaqqiissutissanut alloriarnerit siullersarinerarpai. Suliniutit katillugit qanoq akeqassanersut imaluunniit Aningaasaqarnermut Akileraartarnermullu Ataatsimiititaliap qinnuteqaat qaqugu suliarissaneraa opslagimi ilisimatitsissutigineqanngilaq.
