Nunani allani ilinniakkaminnik naammassinnittut 40 pct.-ii sinnerlugit ukiut qulit qaangiunneranni suli Kalaallit Nunaanni najugaqanngillat. Kalaallit Nunaanni Naatsorsueqqissaartarfiup kisitsisaataasa nutaat takutippaat angerlartut amerlassusiisa agguataarnerat 2009-miilli allanngungaarsimanngitsoq.
Kalaallit Nunaannit ukiut tamaasa inuusuttut nunarsuarmut aallartarput, ilinniakkanik maani pineqarsinnaanngitsunik ilinniariartorlutik. Taakkua ilarpassui uterneq ajorput.
Tamanna Kalaallit Nunaanni Naatsorsueqqissaartarfiup kisitsisaataasa nutaamik saqqummiunneqartut takutippaat. Kisitsisit takutippaat nunani allani inuussutissarsiutinut ilinniakkamik imaluunniit ingerlaqqiffiusumik ilinniakkamik naammassinnissimasut tamatuma kingorna ukiuni tulliuttuni sumi najugaqarnersut.
Ilinniakkamik naammassinninnerup kingorna ukioq ataaseq qaangiukkaangat taamaallaat 37 pct.-ii Kalaallit Nunaanni najugaqartarput. Ilaasa ilinniarnertik nangittarpaat, amerlanertigut bacheloritut ilinniakkap kingorna kandidatitut ilinniarlutik, ukiunilu tulliuttuni angerlarsimasut amerliartortarput. Ukiulli arfineq-pingasut qaangiunneranni amerlanerpaaffimminnut 56 pct.-inut annguttarput, tamatumalu kingorna amerleriaqqinneq ajorlutik. Ukiut qulit qaangiunneranni suli 45 pct.-it missaat Kalaallit Nunaata avataani najugaqartarput.
Kalaallit Nunaanni ilinniakkaminnik naammassinnittunut pissutsit allarluinnaapput. Ukiut qulit qaangiunneranni taakkua 90 pct.-ii suli nunatsinni najugaqartarput.
Ukiumiit ukiumut ineriartorneq allanngunngitsoq
Kisitsisini maluginiarnarnerpaavoq allannguutinik annikitsuinnarnik pisoqarsimanera. Kalaallit Nunaanni Naatsorsueqqissaartarfiup 2009-miit 2020-mut ilinniakkaminnik naammassinnittut sisamanut immikkoortillugit sanilliussimavai, taakkualu grafini titarnertaat imminnut qalleraangajapput. Kisitsisit naapertorlugit nunani allani ilinniakkaminnik naammassinnereerlutik Kalaallit Nunaanni najugaqalersartut amerlassusiisa agguataarnerat ukiuni kingullerni allanngungaarsimanngilaq.
2018–2020-mi ilinniakkaminnik naammassinnittut, ukiuni arfineq-pingasuni malinnaavigineqarsinnaasut kingulliit, 2015–2017-imi naammassinnittunut naleqqiullugit allaat ikinnerulaarput. 2018–2020-mi naammassinnittut 52 pct.-iisa missaat ukiut arfineq-pingasut qaangiunneranni Kalaallit Nunaanni najugaqarput, siusinnerusukkut naammassinnittut 57 pct.-iisa missaannut naleqqiullugit.
Tassa ullumikkut angerlartartut amerlassusiisa agguataarnerat ukiut 15-it matuma siornatut ippoq.
