Nuup avataani nakorsat 33-usut akornanni taamaallaat arfineq-marluk aalajangersimasumik atorfeqarput. Sinneri taartaapput, Peqqinnissamut Siunnersuisoqatigiit ukiumoortumik nalunaarusiaanni kisitsisit nutaat taama takutitsipput.
Nuup avataani napparsimasut amerlanertigut nakorsanit sivikitsumik tikeraarlutik sulisunit nakorsarneqarput. Tamanna Peqqinnissamut Siunnersuisoqatigiit 2026-mut ukiumoortumik nalunaarusiaanni atuarneqarsinnaavoq. Nalunaarusiami peqqinnissaqarfiup sulisunik aqutsinermut qitiusumik immikkoortortaqarfianit paasissutissat ilanngunneqarput.
Kisitsisit 2026-mi juulip qulingiluaanni naatsorsorneqarput. Taakku takutippaat Nuup avataani peqqinnissaqarfinni nakorsat 33-t atorfeqartut, taakkunanngalu taamaallaat arfineq-marluk aalajangersimasumik atorfeqartut. Sinneri 26-t taartaapput.
Peqqinnissaqarfinni pissutsit assigiinngillat. Kujataani nakorsat sisamaapput, tamarmillu taartaallutik. Avannaani nakorsat qulit akornanni ataaseq aalajangersimasumik atorfeqarpoq, Diskomilu nakorsat qulingiluat akornanni ataaseq aalajangersimasumik atorfeqarluni. Qeqqani pissutsit pitsaanerpaapput: nakorsat arfineq-pingasut akornanni sisamat aalajangersimasumik atorfeqarput.
Nuummi pissutsit allaanerupput. Tassani nakorsat 90-it akornanni 68-it aalajangersimasumik atorfeqarput. Nuna tamakkerlugu nakorsat 60 procentii aalajangersimasumik atorfeqarput, kisitsisilli taama qaffasitsiginera pingaartumik Nuummi pissutsinik tunngaveqarpoq.
Affaat immikkut ilisimasalittut nakorsatut akuersissuteqanngillat
Peqqinnissamut Siunnersuisoqatigiit aamma nakorsat tamarmik akuersissutinik nalunaarsuiffimmi paasissutissaat misissorlugit, aalajangersimasumik atorfeqartut sulinngiffeqartut naatsorsuinermit ilanngaatigeqqavaat. Inernerata takutippaa sapaatip-akunnerani 29-mi nakorsat sulisuusut affaasa missaat nakorsaasut inuusuttuusut, immikkut ilisimasalittut nakorsatut akuersissuteqanngitsut.
Siunnersuisoqatigiit namminneq erseqqissaatigaat kisitsisit aasaanerani sulinngiffeqarnernit sunnerneqarsimasut. Ukiuunerani siusinnerusukkut marloriarluni naatsorsuisimanerit agguataarineq allaanerusoq takutippaat. Aamma kisitsisini taamaallaat kalaallit isumaqatigiissutaat naapertorlugit atorfeqartut pineqarput, taamaattumik nakorsat taartaasartunik sulisussarsiuussisarfinni sulisuusut ilanngunneqanngillat.
Qaammatini marlunni affarmilu sulisarput
Nalunaarusiap aamma takutippaa taartaasartut qanoq sivikitsigisumik sulisarnerat. 2021-mit 2025-mut piffissami nakorsat immikkut ilisimasallit nakorsallu qullersat taartaasutut atorfeqarnerat agguaqatigiissillugu qaammatini 2,5-ni sivisussuseqartarpoq. Amerlasuulli uteqqittarput: piffissami tassani agguaqatigiissillugu inummut ataatsimut 2,1-riarlutik.
– Peqqinnissaqarfik patajaatsunngussanngilaq sulisut ilarpassui sivikitsumik atorfeqartillugit avataaneersunik sulisussarsiuunneqartartillugit, Peqqinnissamut Siunnersuisoqatigiit allapput.
Siunnersuisoqatigiit aamma erseqqissaatigaat aalajangersimasumik atorfeqartut taartaasartut sulilluarsinnaanerannut tunngaviusut. Siunnersuisoqatigiit naapertorlugit sulisussarsiuussineq pillugu oqallinnermi aalajangersimasumik atorfeqartut sulinerat amerlanertigut maluginiarneqartanngilaq.
