Piffissaligaanngitsumik inissiisarfimmiittussanngorlugit eqqartuunneqarsimasut amerlassusaat sukkasuumik qaffakkiartorpoq, Naalakkersuisut nalunaarusiami nutaami allapput. Suleqatigiissitap maanna tamanna sooq taamaannersoq paasiniaassavaa.
2025-mi aggustimi Kalaallit Nunaanni Pinerluuteqarsimasunik Isumaginnittoqarfiup inissiisarfiini inuit 35-t piffissaligaanngitsumik inissiisarfimmiittussanngorlugit eqqartuunneqarsimasut inissisimapput. Tamanna Naalakkersuisut nalunaarusiaanni “Eqqartuussiveqarnermi takorluukkat pingaarnersiuinerillu 2026”-mi atuarneqarsinnaavoq. Nalunaarusiaq Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoqarfimmit saqqummersinneqarpoq.
Piffissami tassani Danmarkimi inuit 89-it piffissaligaanngitsumik inissiisarfimmiittussanngorlugit eqqartuunneqarsimasut suli misiligutaasumik iperagaasimanngillat. Kisitsisit Danmarkimi Pinerluuteqarsimasunik Isumaginnittoqarfiup aqutsisoqarfianeersuupput.
Innuttaasut amerlassusaat naatsorsuinermut ilanngutinngikkaanni kisitsisit amerlasoorpasinngillat. Danmarkip innuttaasui 5,8 millionit missaanniipput, Kalaallillu Nunaata innuttaasui 56.700-t missaanniillutik. Taamaalilluni Kalaallit Nunaanni innuttaasut 100.000-iugaangata piffissaligaanngitsumik inissiisarfimmiittussanngorlugit eqqartuunneqarsimasut 62-it missaanniipput, Danmarkimi 1,5-it missaanniillutik. Tassa Kalaallit Nunaanni 40-riaammik amerlanerupput.
Tamatuma saniatigut inuit aqqanillit Kalaallit Nunaanni pinerluttulerinermi inatsit naapertorlugu Danmarkimi tarnikkut nappaatilinnik katsorsaanermik siulersorneqartumi inissiisarfimmiittussanngorlugit eqqartuunneqarsimapput. Taakku ilanngukkaanni Kalaallit Nunaanni innuttaasut 100.000-iugaangata 81-it missaanniilissapput.
“Ernumanartumik ineriartorneq”
Naalakkersuisut kisitsisit ernumanartoqartinnerat isertuutinngilaat. Piffissaligaanngitsumik inissiisarfimmiittussanngorlugit eqqartuunneqarsimasut sukkasuumik amerliartornerat nalunaarusiami “ernumanartumik ineriartornertut” taaneqarpoq. Tamanna inuiaqatigiinnut ernumanartoqarpoq, aammali Kalaallit Nunaanni piffissaligaanngitsumik inissiisarfimmiittussanngortitsilluni eqqartuussinerit nunanut allanut sanilliunneqartartunut naleqqiullugit malunnaatilimmik akulikinnerunerat ernumanartoqarluni.
Taamaattumik Kalaallit Nunaanni Eqqartuussiveqarneq pillugu Siunnersuisoqatigiit 2025-mi ataatsimiinnerata kingorna ineriartornermik misissuisussamik suleqatigiissitaliorneqarpoq. Suleqatigiissitap suliani qaqugu naammassissagaa naatsorsuutigineqarnersoq nalunaarusiami oqaatigineqanngilaq.
