Vivi Kleist Atuarfinni MISI-milu sulianik aqutsisutut nutaatut Kommune Kujallermit 1. oktober aallarnerfigalugu atuutilertussamik atorfinitsinneqarpoq.
Vivi Kleist atuarfeqarnermi ukiorpassuarni misilittagaqarluni atorfittaaminut pivoq. Sulinermini ilaatigut ilinniartitsisutut, atuarfiup pisortaata tulliatut, atuarfiup pisortaaneratut, kiisalu atuarfiup siunnersortaatut sulisarsimavoq. Tamatuma saniatigut aqutsisutut ilinniagaqarsimavoq taavalu immikkut atuartitsinermut, perorsaanikkut aqutsinermut, atuarfiup angerlarsimaffiullu suleqatigiinnerannut kiisalu oqartussat assigiinngitsut suleqatigiinnerannut misilittagaqarluarluni.
Vivi Kleist ukiuni qassiinissaaq nammineq kajumissutsiminik suliaqarsimavoq, taamaalillunilu atuarfiup, meeqqat inuusuttuaqqallu, kiisalu inuiaqatigiit avatangiisuusut peqatigiinnerannut ilisimasaqarluarluni.
Kalaallit Nunaanni meeqqat atuarfiat ilisimalluaqaa, immikkullu atuartitsinermut assorsuaq misilittagaqarluni.
Vivi Kleist atorfininnissaq pillugu oqaloqatigineqarnermini nunatsinni meeqqat atuarfiata ineriartortinneqarneranut peqataarusunnerminik ersersitsivoq. Atuarfimmik ineriartortitsineq Vivip siammasissumik isigaa, tassa atuartitsinerup, ilinniartitsisut sulinerisa, atuartut ilikkariartornerisa, atugaasa aammalu inuiaqatigiit avatangiisaasut ataqatigiiffigisaattut. Taamaapportaaq atuarfiup kiisalu kommmunip paaqqinnittarfiisa sukisaarsaartarfiisa taavalu meeqqanut inuusuttuaqqanullu suliniutaasa akornanni ataqatigiinneq eqqarsaatigalugu.
Sulianik aqutsisutut Vivi Kleistip suliassaqarfik akisussaaffigilerpaa suliatigut perorsaanikkullu ineriartortitsiviusussaq, aningaasaqarnermik aqutsiviusussaq, inatsisinut naapertuuttussaq kiisalu aaqqissugaanikkut ineriartortinneqartussaq.
-Vivi atuarfimmit siammasissorujussuarmik misilittagaqarpoq, kiisalu suliassaqarfiit akisussaaffigiligassani ilisimaarilluarlugit. Atuarfinni suleriaatsit ilisimavai, peqatigisaanillu aaqqissugaanikkut ilungersunartorsiutissavut paasilluarsimallugit. Atuarfeqarnikkut killiffigisatsinni Vivip nukituffii atorfissaqarluaqaat. Suliamut ilisimasaqarluarpoq, peqqissaartuulluni, akisussaassuseqarluni ineriartortitsinissamillu siunnerfeqartuulluni. Suliamut ataatsimoorluta suliareqqitassatsinnut tamanna aallaavissaalluarpoq, ingerlatsivimmi pisortaq Annga Lynge oqarpoq.
Kommune Kujalliup atuarfeqarnikkut ataatsimut sammiveqarnermik nukittorsaarusulerfia nalerorlugu atorfinitsitsineq pivoq, tamatumani qitiussallutik suliatigut ineriartorneq, erseqqissumik aqutsisoqarneq, patajaassuseq, inatsisinik malinninneq kiisalu akisussaassusilimmik aningaasanik aqutsineq.
