Nanortalimmi nunaqarfittaanilu innuttaasut amerlanerussuteqartut Nanortaliup nammineq kommuninngorusullutik taasisimapput. Taasinerli isumasiuinerummat kommunip aaqqissugaaneranut maanna atuuttumut allannguutaanngilaq.
Septembarip aqqarnani Nanortalimmi nunaqarfittaanilu inuttaasut isumasiuititsinermut taasisinnaasut apeqqut: Kissaatigaajuk Nanortalik, nunaqarfiillu tassunga atasut Narsarmijit, Aappilattoq, Tasiusaq, Ammassivik kiisalu Alluitsup Paa Kommune Kujallermit anillutik namminneq kommuninngussasut? – Aappimik, naamimilluunniit akisassaq taasissugaat.
Taasinerillu kisinneqarneranni paasinarsinarsivoq Nanotalimmi eqqaanilu nunaqarfinni innuttaasut Nanortallip namminerisamik kommuninngornissaanut siunnerfeqarlutik taasisimasut.
Taasititsinerup inernera isumasiuineruvoq
Isumasiuititsilluni taasititsineq kommunip aaqqissuussaanera pillugu innuttaasunut isummertitsineruvoq. Taasititsinerullu inernera isumaqanngilaq Nanortaliup nunaqarfittaasalu ingerlaannaq atuutilertumik Kommune Kujallermiit anisussanngornerannik.
Kommunit aaqqissuussaanerannik allannguisoqarsinnaanera Kommune Kujalliup kisimiilluni aaliangiiffigineqarsinnaanngilaq. Taamaattumik isumasiuilluni taasititsinerup inernera innuttaasut isummaminnik nalunaaruteqarnerattut isigineqassaaq, Inatsisartunilu politikkikkut suleriaqinnissami atorneqarsinnaalluni.
-Taasititsinerup inernerata innuttaasut amerlanerussuteqartut apeqqummut qanoq isumaqarnerat takutippaa. Erseqqissassalluguli pingaaruteqarpoq taasititsineq una isumasiuilluni taasititsinerummat. Taamaattumik taasititsinerup inernera Nanortaliup namminerisamik kommuninngorneranik isumaqanngilaq. Kommunimmi aaqqissuussaanerannik allannguinissaq Kommune Kujallermiit aalajangiiffigineqarsinnaanngilaq. Suliassaq nuna tamakkerlugu politikkikkut suliarineqarumaarpoq, taasititsinerullu inernera innuttaasut isummersornerattut ilaatinneqarumaarpoq, Kommune Kujallermi pisortaaneq Randi Vestergaard Evaldsen oqarpoq, nangillunilu sulisut taasititsinermi sulisimasut qutsavigalugit.
– Sulisut taasiartorfinni sulisimasut aamma isumasiuilluni taasititsinerup pilersaarusiorneqarneranut ingerlanneqarnissaanullu peqataasimasut tamaasa qamannga pisumik qutsavigerusuppakka. Suliassaq annertusimavoq, sulisulli sulilluarneratigut taasititsineq taasinernillu kisitsineq eqqortumik toqqissisimanartumillu ingerlanneqarluni naammassilluarpoq, Randi Vestergaard Evaldsen qujamasulluni oqarpoq.
Taasinerit amerlassusaat agguataarnerallu
Nanortalimmi eqqaanilu nunaqarfinni innuttaasut taaseqataasinnaasut 1.093-iupput.
Taakkunannga 680-it taaseqataasimapput, procentinngorlugu taasiartorsimasut 62,2 procentiullutik, 413-illu taasiartorsimanngitsut procentinngorlugu 37,79 procentiullutik.
- Taasisinnaasunit 58,83 procentit Nanortaliup nunaqarfiittaasalu Kommune Kujallermit anillutik namminerisamik kommuninngornissaannut akuersipput. Matumani 643-t taasisimapput, taasisimasuniit procentinngorlugu 94,56 procentiullutik.
- 2,65 procentit taasisinnaasuniit naaggaarput, Kommune Kujallermiiginnarnissartik kissaatigalugu. Matumani 29-t taasisimapput, tasisimasuniit procentinngorlugu 4,26 procentiullutik.
- Taasisinnaasuniit taasinerit 0,73 procentit atorsinnaanngillat. Matumani arfineq pingasut taasisimapput, taasisimasuniit procentinngorlugu 1,18 procentiulluni.
Sumiiffinni taasisimasut procentinngorlugit
- Nanortalik: 64,60 procent
- Aappilattoq: 57,70 procent
- Narsarmijit: 66,79 procent
- Tasiusaq: 46,20 procent
- Ammassivik: 56,50 procent
- Alluitsup Paa: 50,90 procent
Isumasiuilluni taasititsinerup inernera Nanortaliup nunaqarfiisalu siunissami kommunitut qanoq inissisimassanerat pillugu apeqqummik suliareqqinnissamut atorneqassaaq.
