Pipaluk Jakobsen Larsen (Inuit Ataqatigiit) Kommune Kujalleq kajumissaarpaa aaqiissutissamik piaartumik nassaartoqarnissaanik. Borgmesterimut allagaqarsimavoq, akissuteqartoqanngilarli.
Piffissami sivisoqisumik Nanortallip atuarfia peqqinnanngitsoq silaannaq meeqqat, sulisut atuisullu ulluinnarsiutigisimavaat. Taama allappoq Pipaluk Jakobsen Larsen, Inuit Ataqatigiit, allakkani ammasuni.
“Naamaleqaaq, tusaanngitsuusaaginnarsinnaangilagut,” allappoq.
Oqarpoq atuisut kissaatigaat Nanortallip atuarfia ukkatarineqassasoq, qinikkatullu tamanna isiginngitsuusaaginnarsinnaanngikkaat.
Nassuiaavoq borgmesterimut allagaqarsimalluni, Naalakkersuisunut saaffiginnittoqassasoq, tamannali suli pisimanngilaq. Naak atuarfiit kommuunip akisussaaffigigaluarai, isumaqarpoq kommuuni aningaasatigut kisimiilluni nammassinnaanngikkaa.
“Isumaqarpunga Kommune Kujallermi aaqiisoqartariaqartoq, piaartumik,” allappoq.
Eqqaasitsivoq kommuuni qinersinermi aqutsilluarneq tunaartaralugu qinnuteqarsimasoq:
“Aqutsilluarneq tunaartaralugu qineqqusaarsimagaani tamanna timitalerneqartariaqalerpoq tigussaasumik.”
Allakkani ima naggasiuppai:
“Innuttaasut sullittussaavagut, tusaanngitsuusaarnagit. Nanortallip atuarfia peqqinnanngitsoq aaqiivigineqarli! Inuup peqqissusaanut innarliinnginnissaq piaartumik sulissutigisariaqarparput.”
