Kommune Kujalleq-mi innuttaasut suliffeqarfiillu ippassaq eqqagassanik katersinermut peqataasut kommunaldirektørip Randi Vestergaard Evaldsenip qujassuteqarfigai. Taassuma oqaatigaa ulloq tunniusimaffiulluni, ataatsimoorfiulluni akisussaassuseqarfiullunilu nuannersumik ingerlanneqarpoq.
– Kommune sinnerlugu ippassaq eqqagassanik katersinermi peqataasimasut tamaasa qamannga pisumik qutsavigerujussuarpakka. Ulloq tunniusimaffiulluni, ataatsimoorfiulluni akisussaassuseqarfiullunilu nuanningaarpoq, oqarpoq.
Pisortaaneq naapertorlugu innuttaasut amerlasuut nuannaarlutillu peqataalluarnerat assut qiimmaallannarsimavoq.
– Inuit taama amerlatigisut nuannaarlutik, qungujulaarlutik tulluusimaarlutillu kommunitsinnik isumaginnilluarnerat takullugu assut qiimmaallannarpoq. Assit eqqagassarpassuillu takullugit allamik oqarsinnaanngilanga: annertoorujussuarmik naammassisaqarsimavusi. Naammassisasi tulluusimaarutigalugillu qujassutigeqaakka. Pinngortitap suliaq qujarussimassaqigaa qularnanngivippoq, oqarpoq.
Peqatigisaanik kommunimi avatangiisit eqqiluitsuunissaannut tamatta akisussaaffeqartut oqaatigaa.
– Eqqagassat ilaat soorunami anorersuarmik silamillu pissuteqartarput, ajoraluartumilli eqqagassanik nalinginnaasunittaaq illoqarfitsinni nunaqarfitsinnilu pinngortitamut igiinnarneqartartunik naammattuugassaqartarluni. Taamaammat avatangiisivut eqqiluitsuutinniarlugit asulilu eqqaasunik takugaangatta inerterisarnissarput pingaaruteqarpoq – kimmivikuuppata allaappataluunniit. Eqqagassat eqqaavimmut igitassaapput, oqarpoq.
Pisortaaneq suliffeqarfinnut ullormi assigiinngitsutigut ikiuussimasunut, soorlu sikulerneq, imeruersaatit allatigullu tapersersuinerit pillugit immikkut ittumik aamma qujassuteqarpoq.
Tamatuma saniatigut Kommune Kujalleq peqataasunut kajumissaarivoq Facebook-imi oqaaseqaateqarfimmi assinik ikkusseqqullugit. Kommunip assit misissussavai kingornalu ajugaasoq imaluunniit ajugaasut akissarsiassannguamik tunineqartussanik toqqaasoqassaaq.
Kiisalu teknikkeqarfik eqqiaanermi suliassat aaqqissuussimammagit kiisalu eqqakkanik katersorneqartunik aallerluni suliaqarsimammat immikkut qutsavigineqarpoq.
– Suliarput kingulliunngilluinnarpoq, tullissaanillu ataatsimut suliniuteqarnissatsinnut qilanaalereerpunga, oqarpoq pisortaaneq Randi Vestergaard Evaldsen.