Imigassamik tuniniaanerup unitsinneqarallarnissaa borgmesteri Malene Vahl Rasmussen naapertorlugu Kujataani malunnartumik pitsanngoriaateqartitsisimavoq. Kommunip maanna Brugsen aamma Pisiffik imigassamik tuniniaanerup ammaqqikkiartuaarneqarnissaa pillugu oqaloqatigissavai.
Imigassamik tuniniaanerup unitsinneqarnera sioqqullugu sapaatit akunnerini marlunni politiit imigassamut attuumassuteqartuni suliassani 22-riarlutik aggersarneqarput. Tuni niaanerup unitsinneqarnerata kingorna marloriarlutik aggersarneqarsimapput.
Kommune Kujallermi borgmesteri Malene Vahl Rasmussen kommunip Facebookimi quppernerani nalunaaruteqarluni taama ilisimatitsivoq. Nalunaarummi kommunip suliai kiisalu Naalakkersuisunut, politiinut inuussutissarsiortunullu ataatsimeeqateqarnini killiffissiorpai.
Tuniniaanerup unitsinneqarnerata kingorna politiit marloriarlutik aggersarneqarnerat piffissamut qanoq sivisutigisumut tunnganersoq borgmesterip nalunaarutaani allassimanngilaq.
Malene Vahl Rasmussen naapertorlugu politiit pisortaat ataatsimeeqatigiinnermi suliniummut tapersiisimavoq, oqaatigalugulu Kujataani politiit sulisui pissutsit sukkasuumik malunnartumillu pitsanngoriarsimanerat malugereersimagaat.
Pitsanngoriaat attatiinnarusuppaat
Borgmesterip erseqqissarpaa imigassamik tuniniaanerup unitsinneqarallarnissaa ataavartumik allannguuteqartitsinissaa kommunip sulissutigigaa.
– Pissutsinut siornatigut atuuttunut uteqqikkusunngilagut. Siunissamut isigisariaqarpugut ataatsimoorlutalu allannguisariaqarluta – tamannalu aamma innuttaasutut ataatsimoornissatsinnik piumasaqaateqarpoq, kommunip Facebookimi quppernerani taama allappoq.
Nuummiinnermini Meeqqanut, Inuusuttunut, Inatsisinillu Atuutsitsinermut Naligiissitaanermullu Naalakkersuisoq kiisalu Peqqissutsimut Innarluutilinnullu Naalakkersuisoq ataatsimeeqatigisimavai. Borgmesteri naapertorlugu imigassamik tuniniaanerup unitsinneqarnerata nalaani suleqatigiinnissamut sinaakkutissat isumaqatigiissutigineqarput.
Aamma ilisimatitsivoq Brugsenip Pisiffiullu pisortaanik ataatsimeeqateqartoqartussaasoq, imigassamik tuniniaanerup ammaqqikkiartuaarneqarnissaa pillugu ataatsimut paasinninnissaq anguniarlugu. Ammaqqinnissamut ulluliussaq piumasaqaatilluunniit sukumiinerusut nalunaarummi allassimanngillat.
Sipaarniutit akiitsullu oqaluuserineqarput
Kommunip aningaasaqarnera aamma Nuummi ataatsimeeqatigiinnerni pingaarutilittut oqaluuserineqarpoq.
Malene Vahl Rasmussenip Aningaasaqarnermut Akileraartarnermullu Naalakkersuisumut kommunimi sipaarniutit taakkualu kingunerisaannik soraarsitsinerit qanoq sunniuteqarnersut nassuiaatigisimavai. Borgmesteri naapertorlugu allanik aaqqiissutissarsiortoqartariaqarnera isumaqatigiissutigineqarpoq.
Tamatuma saniatigut kommuni GrønlandsBANKENip pisortaanik ataatsimeeqateqassaaq, kommunip akiitsuinut taarsersuinissamut nutaamik isumaqatigiissuteqarnissaq isumaqatiginninniutigalugu.
Kujataa arlalinnik tikeraartoqassaaq
Borgmesteri Islandimi Arctic Circle Assembly-mut peqataareerluni angerlaqqammerpoq. Tassani kommunimi aatsitassarsiornermik suliniutit takkuttussat inuiaqatigiinnut qanoq sunniuteqarsinnaanerat pillugu oqaloqatigiinnernut peqataavoq.
Sapaatit akunnerini marlunni aggersuni aamma arlalinnik tikeraartoqassaaq. Aarhusip borgmesteria aallartitanik ilaqarluni illoqarfittut ikinngutigiittut nutaamik isumaqatigiissummik atsioriaartussaaq. Nunanut Allanut Ministereqarfimmi atorfilittat qaffasissumik inissisimasut aamma Kujataani pissutsit nunanut allanut politikkimut attuumassuteqartut pillugit ilisimatinneqassapput.
Sulisitsisut siulersuisui aamma kommunimut tikeraassapput. Sulisitsisut siulersuisuisa ataatsimiinnissaata saniatigut inuusuttunut ataatsimeersuartitsisoqassaaq.
Paasissutissarsiffik: Kommune Kujalliup Facebookimi quppernera.
