Partiit sisamat suliffissaaleqisunut piumasaqaatit sukaterneqarnissaat, pensionisiaqarnermi aaqqissuusseqqinnissaq kiisalu 2028-mit meeqqerivinni akeqarunnaarnissaq isumaqatigiissutigaat.
Suliffissaaleqisut sulisinnaasut suliffissarsiunngikkunik imaluunniit suliffissaqalersitsiniarluni suliniutinut takkutinngikkunik, tamanna aningaasatigut ingerlaannartumik malugissavaat. Tamanna 2027-mut aningaasanut inatsimmut isumaqatigiissummi, Demokraatit, Inuit Ataqatigiit, Siumut Atassullu ataasinngornermi novembarip 9-anni Nuummi atsiorfiani, immikkoortut malunnaateqarnerpaat ilagaat.
»Inuit innersuunneqarlutik sulilersinnaasut pisortanit pilersorneqarnissartik namminneq toqqarsinnaassanngilaat«, partiit isumaqatigiissummi allapput.
Partiit sisamat Inatsisartuni inissat 31-t keessaa 23-nik inissaatitaqarput. Taamaalilluni aningaasanut inatsisip pingajussaaneerneqarnerani isumaqatigiissut amerlanerussuteqartunit taperserneqarpoq. Naleraq kisimi isumaqatigiissummut ilaanngilaq.
Kingusinnerpaamik ukioq ataaseq qaangiuppat inatsisissatut siunnersuut
Ikiorsiissutinik pisinnaatitaaneq suliffissarsiornissamut, piginnaanngorsaanermut suliffissaqalersitsiniarlunilu suliniutinut peqataanissamut pisussaaffeqarnermik ilaqassaaq. Kommunit suliffissarsiornerup takkuttarnerullu malinnaaviginissaannut erseqqissunik malittarisassaqarlutillu sakkussaqassapput. Piumasaqaatilli inuk ataasiakkaaq qanoq sulisinnaassuseqartiginersoq tunngavigalugu aalajangersarneqassapput.
Partiit Naalakkersuisut »sakkortuumik« kaammattorpaat kommunit peqatigalugit inatsisissatut siunnersuusiussasut. Siunnersuut kingusinnerpaamik 2027-mi ukiakkut ataatsimiinnermi saqqummiunneqassaaq. Akileraartarnermut ikiorsiissutinullu malittarisassat ataqatigiinnerisigut sulinerup aningaasatigut imminut akilersinnaanera erseqqissumik qulakkeerneqassaaq.
Tamatumunnga pissutaavoq sulisussanik amigaateqarneq. Inuit amerlanerusut sulilernerisigut avataanit sulisussarsiornissaq annikillisinneqassaaq, atugarissaarnerullu aningaasalersorneqarnera nukittorsarneqassaaq.
Pensionisiallit amerlanerusunik isertitaqarsinnaassapput
2027-mi pensionisiaqartitsinermik tamakkiisumik aaqqissuusseqqinnissaq piareersarneqassaaq. Aaqqissuusseqqinneq pilersaarutit malillugit 2028-mi januaarip aallaqqaataani atuutilissaaq. Ilaatigut immikkut ilisimasallit ataatsimiititaliaata isumaliutissiissutaa, 2027-mi marsimi saqqummiunneqartussatut naatsorsuutigineqartoq, tunngavigineqassaaq.
Isumaqatigiissut naapertorlugu malittarisassat maanna atuuttut, pensionisiallit sulinermikkut isertitaqaraangata utoqqalinersiaannik annikillisitsisartut, aallaavittut atorunnaarsinneqassapput. Ineqarnermut tapiissutit ikiorsiissutillu allat pensionisianut qanoq sunniuteqartarnerat misissorneqassaaq, sulinerup aningaasatigut iluaqutissartaa annaaneqaqqunagu. 2028-mit ukiumut 38,3 mio. kr.-t immikkoortinneqarput, 2027-milu piareersaanissamut 2 mio. kr.-t immikkoortinneqarlutik.
2028-mit meeqqeriviit akeerutissapput
2028-mi januaarip aallaqqaataanit angajoqqaat meeqqamik meeqqerivimmiinnerannut akiliisarunnaassapput. Ukiumut 37 mio. kr.-t immikkoortinneqarput. Taakku kommunit ullumikkut angajoqqaanit akiliutitut isertittagaasa amerlaqataat. Kommunit meeqqerivinnik ingerlatsisuummata, aaqqissuussineq kommuninik immikkut isumaqatigiissuteqarnissamik pisariaqartitsivoq.
Ineqarnermut tapiissutit namminerlu peqataaffigalugu illuliorneq
Ineqarnermut tapiissutit aamma aaqqissuuteqqinneqassapput. Nukissiorfiit akigititaat qaffattussaammata, ilaatigut misissorneqassaaq ineqarnermut tapiissutit kiassarnermut aningaasartuutinut matussusiissanersut.
Partiit aamma isornartorsiorpaat nammineq peqataaffigalugu illuliornissamut atugassiisarneq arriippallaartoq. Naalakkersuisut »sakkortuumik« kaammattorpaat 2027-mi sapinngisamik piaartumik malittarisassanik nutaanik eqaannerusunillu aalajangersaassasut.
PAASISSUTISSAT
- Suliffissaaleqisunut piumasaqaatit – Inatsisissatut siunnersuut kingusinnerpaamik 2027-mi ukiakkut ataatsimiinnermi saqqummiunneqassaaq.
- Pensionisiaqartitsinermik aaqqissuusseqqinneq – 2028-mit ukiumut 38,3 mio. kr.
- Meeqqeriviit akeerunnerat – 2028-mit ukiumut 37 mio. kr.
- Partiit isumaqatigiissuteqartut – Demokraatit, IA, Siumut aamma Atassut. Inatsisartuni inissat 31-t keessaa 23-nik inissaatitaqarput.
Paasissutissarsiffik tassaavoq 2027-mut aningaasanut inatsimmut isumaqatigiissut.
