– Meeqqat amerlavallaat ilaqutariinni aningaasaatiminnik naammattusaarsinnaanngitsuni peroriartorput.
Ilaqutariit meerartallit juullimut ikiorneqarnissamik pisariaqartitsinerat annertuvoq. Nanubørn novembarip aallaqqaataani ukioq manna juullimut ikiorneqarnissamut qinnuteqartitsilerami novembarip 7-ata tungaanut qinnuteqaatinik 750-init amerlanerusunik tigusaqareerpoq. Siorna qinnuteqarfiusup ingerlanerani tamarmi tiguneqartunit 100-t missaannik amerlanerupput. Novembarip 15-iata tungaanut suli qinnuteqartoqarsinnaavoq.
Qinnuteqartut taama amerleriartiginerat Nanubørnini ernumassutigineqangaarpoq. Peqatigiiffiup siulittaasua Lotte Østergaard oqarpoq pissutsit ilungersunartut.
– Ullualuit ingerlanerinnaanni taama amerlatigisunik qinnuteqartoqarsimanera Kalaallit Nunaanni ilaqutariit meerartallit amerlavallaat aningaasaqarnikkut ilungersunartorsiortut annernartumik ersersitsivoq. Ilaqutariit ulluinnarni pisariaqartitanut aningaasaatiminnik naammattusaarniapiloortut pineqarput. Aningaasaqarneq ilungersunareerpat juulli nuannaarfissaanani qilanaarfissaananilu ernumaffinngortarpoq. Angajoqqaat meeqqamik juullisiortikkusutaattut juullisiortitsinissamut qanoq akissaqalernissartik isumakuluutigisarpaat, Lotte Østergaard oqarpoq.
Meeqqat tamatumunnga akiliisussanngortinneqassanngillat
– Juulli meeqqanut immikkut pingaaruteqarpoq. Juulliaqqamut, tunissutissanut ilaquttanillu ilagisaqarnissamut qilanaartarput. Meeqqat arlaannaalluunniit angajoqqaami juullisiortitsinissamut akissaqannginnerat pissutigalugu avataaniittutut misigissanngillat. Ilaqutariit aningaasaqarnikkut ajornartorsiutaat aaqqiisinnaanngilavut, meeqqalli juullimi nuannersumik misigisaqarnissaannut nuannersunillu eqqaamasassaqarnissaannut peqataasinnaavugut, Lotte Østergaard oqarpoq.
Siorna Nanubørn Kalaallit Nunaanni tamarmi ilaqutariinnik 600-t missaannik ikiuisinnaasimavoq. Qinnuteqartut amerliartornerat pissutigalugu peqatigiiffiup neriuutigaa ukioq manna katersuiniarneq suli amerlanernit tapersersorneqassasoq.
Katersorneqartut tamarmik juullimut ikiuinermut atorneqassapput
Nanubørnit juullimut ikiuinerat kajumissutsimik suliaqarnerannik tunngaveqarpoq. Aningaasat katersorneqartut tamarmik Kalaallit Nunaanni meeqqat ilaqutariillu juullimut ikiorneqarnissaannut toqqaannartumik atorneqassapput.
Suliffeqarfiit, aningaasaateqarfiit inuillu namminneq kajumissutsiminnik ukioq manna katersuiniarnermut tapersiipput. Tapersersuineq peqatigiiffimmut pingaaruteqarluinnarpoq.
– Tapersersuinissaminnik aalajangereersimasut tamaasa qutsavigingaajarpavut. Suliffeqarfiit aningaasaateqarfiillu aningaasaliissutaat annertuut inuillu ataasiakkaat tunissutaat annikinnerusut tamarmik iluaqutaapput. Ataatsimoorneq ikioqatigiikkusunnerlu pissutigalugit ilaqutariit taama amerlatigisut juullimut ikiorsinnaavavut, Lotte Østergaard oqarpoq.
Tapersersuineq annertoreeraluartoq suli ikiuinissaq pisariaqartinneqarpoq.
– Qinnuteqaatit tigusareersimasavut qassiunersut takugaangatsigu suliassaq annertooq utaqqisoq nalunngilarput. Kikkut tamaasa ikiorsinnaagutsigit kissaatigaarput, qanorli amerlatigisunik katersisinnaanerput apeqqutaavoq. Taamaattumik neriuutigeqaarput suli amerlanerusut peqataassasut. Tunissutit tamarmik meeqqat amerlanerusut juullimi nuannaarlutillu qilanaarsinnaanerannut iluaqutaapput, Lotte Østergaard oqarpoq.
Nanubørnit 2026-mi juullimut ikiuinerat ima tapersersorsinnaavat
MobilePay 106929
Bankikkut nuussineq 6471-7848622
Aningaasat nuukkaangakkit oqaasertaliussaq una allaguk “Nanubørn Julehjælp 2026”.
