Atassutip politikkikkut siulittaasuata tullia Bentiaraq Ottosen Facebookimi nalunaarpoq partiip naalakkersuisooqatigiinnermi suleqatigiinnermit aniniarluni. Aalajangiinermut pissutaasoq Ottosenip nassuiaatigaa, Atassut naapertorlugu pisunut kingullernut akisussaaffimmik tigusisoqarsimanngimmat.
Atassut Naalakkersuisuniit naalakkersuisooqatigiinniillu anivoq. Tamanna partiip politikkikkut siulittaasuata tullia Bentiaraq Ottosen Facebookimi tamanut ammasumik allappoq. Facebookimi allagaq atuaruk
– Akisussaaffimmik tigusisoqanngilaq aamma naliliinerput najoqqutaralugu naalakkersuinikkut peqataasinnaajunnaarnerput nalunaarutigaarput, Ottosen allappoq.
Ottosen allappoq Atassut naapertorlugu suleqatigiinneq ataqqeqatigiinnermik naapertuilluarnermillu tunngaveqartariaqartoq. Partii naapertorlugu tunngaviit taakku malinneqarsimanngillat. Ottosenip pisut sorliit innersuussutiginerlugit, imaluunniit Atassutip kina akisussaaffimmik tigusisimasariaqarsorinerlugu, erseqqissanngilaa.
Siulittaasoq tallimanngornermi suleqatigiinnerup nanginneqarnissaanik nalornivoq
Atassutip siulittaasua Aqqalu C. Jerimiassen naapertorlugu partiip novembarip aallartinnerani landsmødeqarnerani naalakkersuisooqatigiinnermi suleqatigiinnerup nanginneqarnissaa partiimiit taperserneqarpoq. Tallimanngornermili Jerimiassen Sermitsiamut oqarpoq Atassutip naalakkersuisooqatigiinniiginnarnissaa nalorninartorujussuusoq. Tamanna Inatsisartut Nunatta Karsiata naatsorsuutaanik oqaluuserinninnerisa kingorna pivoq. Oqallinnermi Siumut Nalerarlu immikkut tamarmik Demokraatineersumut Naalakkersuisunut ilaasortamut Nivi Olsenimut tatiginninnginnertik nalunaarutigaat.
