Inuit Pisinnaatitaaffii pillugit Siunnersuisoqatigiit (IPPS) siulittaasoqarnatillu siulittaasup tullianik peqanngillat. Naleraq kikkut Naalakkersuisuni suliassaqarfimmut akisussaanersut, siunnersuisoqatigiillu qanoq sulinertik ingerlateqqissinnaaneraat paasiniarneqarusuppoq.
Inuit Pisinnaatitaaffii pillugit Siunnersuisoqatigiit novembarip 5-ani ataatsimiimmata ilaasortat arlaannaalluunniit maanna atugassarititaasut tunngavigalugit siulittaasunngorusussimanngilaq. Naleraq novembarip 7-ani tusagassiuutinut nalunaarummini taama allappoq.
Nalunaarut naapertorlugu siunnersuisoqatigiit qaammatini kingullerni arfinilinni Naalakkersuisoq susassaqartoq arlaleriarlutik ataatsimeeqatiginiarsimagaluarpaat. Siunnersuisoqatigiit aamma siulittaasoqarnatillu siulittaasup tullianik peqaratik sulinertik qanoq ingerlateqqissinnaanerlugu inatsisilerinikkut piaartumik paasisaqarusupput.
Naleraq allappoq Maritha Brobergip napparsimalluni sulinnginnera ataqqineqassasoq. Partiip Naalakkersuisut kaammattorpai Brobergip sulinnginnerani suliassaqarfimmut politikkikkut kina akisussaanersoq piaartumik nalunaarutigeqqullugu, IPPS-ilu ataatsimeeqatigineqarnissaa qulakkeeqqullugu.
Siunnersuisoqatigiinni atugassarititaasut misissorneqarnissaat kissaatigaa
Siulittaasoq sulinerminut akissarsiaqartinneqareerpoq. Naleraq siulittaasumut ilaasortanullu allanut atugassarititaasut suliassat annertussusaannut naapertuunnersut misissortikkusuppaa.
Partiip sulinermut akissarsiat qaffanneqarnissaat, isertitassaraluanut annaasanut uppernarsarneqarsinnaasunut taarsiissuteqartarneq sulisitsisunulluunniit aningaasartuutinik utertitsisarneq periarfissatut tikkuarpai. Naleraq IPPS aamma sulisitsisut sulisartullu sinniisaat peqatigalugit aaqqiissutissamik nassaartoqarnissaa kissaatigaa.
Spiralilersuisimaneq, inatsisitigut ataataqanngitsut meeravissiartaartitsisimanerlu partiip assersuutitut taavai, Kalaallit Nunaat inuit pisinnaatitaaffii pillugit siunnersuisoqatigiinnik attaviitsunik pisariaqartitsineranut. Naleraq naapertorlugu siunnersuisoqatigiit Kalaallit Inuillu nunap inoqqaavisut pisinnaatitaaffii, tamatumani Inuit nunat killeqarfii akimorlugit attaveqatigiinnerat, suli ukkatarisariaqarpaat.
