Pilersaarut malillugu assartuutip Vestborgip Ilulissat ullumi sisamanngornermi novembarip 5-ani unnukkut nalunaaqutaq 22.00 qimassavai. Eqqakkat Sisimiuni Esanip ikuallaavianut assartorneqassapput.
Eqqakkat ikuallanneqarsinnaasut poortukkat 800-t angullugit Ilulissani eqqaavissuarmit umiarsualivimmut lastbiilinik assartorneqassapput, Vestborgimullu usilersuunneqassallutik. Avannaata Kommunia marlunngornermi nittartakkamini ilisimatitsivoq assartuineq ulluni pingasuni ingerlanneqassasoq, lastbiilillu unnukkut nalunaaqutaq 22.00 tungaanut ingerlaassasut. Avannaata Kommuniata nittartagaa
Eqqakkat assartoruminarnerulersinniarlugit eqqaavissuarmi naqillugit plastikkimik poortorneqartarput. Poortukkat angisuut taakku »skumfiduser«-inik taaneqartarput. Sisimiuni ikuallaavimmi eqqakkat nukissiornermut atorneqassapput.
Vestborgip Upernavimmit eqqakkat poortukkat 304-t usereerpai. Ilulissanit usilersuutit ilanngullugit poortukkat katillugit 1.100-t missaanniittut Sisimiunut assartorneqarnissaat kommunip naatsorsuutigaa. Umiarsuaq aamma Upernavimmit uuliamik atornikumik palle-nik 38-nik kiisalu plastikkimik dunkenik arfineq-marlunnik, tamarmik 1.000 literinik imaqarsinnaasunik, usivoq. Taakku Ilulissani usingiarneqassapput.
Assartuinerup siunertaraa kommunip eqqaavissuarni eqqakkat uninngasuutigineqartut ikilisarnissaat. Avannaata Kommunia naapertorlugu 2025-mi Upernavimmit, Uummannamit Ilulissanillu eqqakkat ikuallanneqarsinnaasut katillugit 4.000 tonsit umiarsuarmik assartorneqarput.
