Kullorsuarmi innuttaasut suliffeqarfinnilu assigiinngitsuni sulisut ulluni marlunni ikiueqqaarnermik pikkorissarput. Nunaqarfimmi aqutsisut siulittaasuata neriuutigaa najukkat allat aamma assingusumik suliniuteqassasut.
Kullorsuarmi oktobarip 24-anni 25-annilu innuttaasunut ikiueqqaarnermik pikkorissartitsisoqarmat inuit 30-t peqataapput. Pikkorissarneq nunaqarfimmi aqutsisut aningaasaliinerisigut ingerlanneqarpoq.
Avannaata Kommuniani upalungaarsimanermut inspektøri Bjarne Markussen ilinniartitsisuuvoq. Taanna oqaluttuarpoq ikiueqqaarnermik ilinniartitsinissaq sivisuumik pisariaqartinneqarsimasoq.
– Ikiueqqaarnermik ilinniartitsinissaq sivisuumik pisariaqartinneqarsimavoq, pikkorissartullu soqutiginnillutik malinnaalluarput, Bjarne Markussen oqarpoq.
Oktobarip 26-anni qatserisartut arfinillit peqataasullu allat marluk uummammik unittoornermi ikiueqqaarnermik nalunaaquttap-akunnerini sisamani pikkorissarput.
Tamanna nunaqarfimmi aqutsisut siulittaasuata Timotheus Petersenip nuannaarutigaa.
– Qatserisartut aamma peqataatinneqarlutik pikkorissarnissamut periarfissinneqarmata nuannaarutissaavoq, taanna oqarpoq.
Timotheus Petersenip neriuutigaa pikkorissartitsisoqaqqikkumaartoq, peqataasut ikiueqqaarnermut allagartaminnik nutarterisinnaaqqullugit. Paasissutissiissutigineqartut naapertorlugit allagartat ukiut marlukkaarlugit nutarterneqartussaapput.
Taassuma Upernaviup eqqaani najukkat allat aamma Kullorsuarmiutulli suliniuteqaqqullugit kajumissaarpai.
– Upernaviup eqqaani najukkat allat aamma assingusumik suliniuteqaqqullugit kajumissaarumavakka, ikiueqqaarnermik pikkorissartitsinissamik pisariaqartitsineq annertuujusoq ersarimmat, Timotheus Petersen oqarpoq.
Najoqqutaq: Avannaata Kommunia.
