Kommuneqarfik Sermersuup Gadeteamia maanna Tasiumik ateqalerpoq. Ateq nutaaq sulisut innuttaasunut isumaginninnikkut sanngiitsumik inissisimasunut angerlarsimaffeqanngitsunullu tapersersuinerannut tulluartuussaaq.
Ateq nutaaq sulisut sulinerannik ersersitsissaaq. Kommuneqarfik Sermersuup Gadeteamia Tasiumik atitaalerpoq, isumaqartoq »assak tapersersuisoq«.
Atip allanngornera sulisut suliassaannik suleriaasiannillu allannguinermik kinguneqassanngilaq. Sulisut innuttaasut isumaginninnikkut sanngiitsumik inissisimasut angerlarsimaffeqanngitsullu ataasiakkaat pisariaqartitaat aallaavigalugit tapersersortuarlugillu ilitsersortuassavaat.
– Uagutsinnut pingaaruteqarpoq innuttaasut assersuutigalugu assaannit tigummillugit ingerlaarneranni tapersersussallugit, namminnerlu inigisaminni ulluinnarni inuunermik qanoq pilersitsisinnaanerannik ilitsersussallugit, Tasiumi immikkoortortaqarfimmi pisortaq Marthannguaq Dahl Bech oqarpoq.
Suliniut kommunip angerlarsimaffeqanngitsuulernissamik pinaveersaartitsineranut angerlarsimaffeqannginnermillu iliuuseqarneranut ilaavoq. Ilaatigut siunertaavoq innuttaasut sanngiitsumik inissisimasut ataasiakkaarlugit tapersersorlugit suliassaqarfiillu akimorlugit suleqatigiinnikkut ataavartumik ineqalernissaannut ulluinnarnilu inuunerisa patajaannerulernissaannut ikiorneqarnissaat.
Ateq nutaaq isumaginninnermi sulisumit Maja Andersenimit, taamani Gadeteamimi sulisuusumit, siunnersuutigineqarpoq. Septembarimi Isumaginnittoqarfimmi sulisut ataatsimoorlutik sammisaqarneranni taasisitsinikkut ateq toqqarneqarpoq.
Sisamanngornermi oktobarip 29-ani nalunaaqutaq 12-imiit Tasiu suliniaqatigiiffillu Hjælp Din Næste Nuummi Brugseni-p silataani akeqanngitsumik nerisassanik, kissartunik imigassanik atisanillu agguaassapput.
Agguaassinerup innuttaasunut pisariaqartitsisunut ulluinnarni pisariaqartitanik ikiorsiissutigineqarnissaa kiisalu Tasiup sulinerata amerlanerusunit ilisimaneqalernissaa siunertarineqarput. Tasiu Hjælp Din Næstelu upernaaq manna suleqatigiilerput.
Paasissutissarsiffik: Kommuneqarfik Sermersooq.
