Kommuneqarfik Sermersuumit ingerlanneqartoq Tasiu aamma ikiuiniaqatigiiffik Hjælp Din Næste Nuummi pisariaqartinneqarsinnaasunik innuttasunut sisamanngornermi agguaammata akeqanngitsumik nerisassaqarpoq, kissartutugassaqarluni atisanillu agguaasoqarluni.
Agguaaneq Nuummi Brugsenip saani sisamanngornermi pisoq, Tasiup aamma Københavnimi suliniaqatigiiffiup naalagaaffimmut attuumanngitsup Hjælp Din Næste-p suleqatigiinneranni iliuusaannut ilaavoq. Suleqatigiinneq 2026-mi upernaakkut aallartippoq, Nuummilu innuttaasut inuuniarnikkut ajornartorsiuteqartut angerlarsimaffeqanngitsullu pisariaqartitaannik agguaaffigineqarnissaat aamma Tasiup sulinerata erseqqinnerulernissaa suleqatigiinnermi siunertaavoq. Tasiu siornatigut Gadeteam-imik taaguteqarpoq, taakku tassaallutik angerlarsimaffeqanngitsunik sullissisartut.
Innuttaasut agguaanermi akeqanngitsumik nerisinneqarput, kissartutortinneqarlutik atisassaannillu tunineqarlutik. Aaqqissuusinermittaaq innuttaasut Tasiumilu sulisut naappinnissaannut periafissaavoq.
“Innuttaasut sumiiffigisartagaanni naapinnissaat aamma pisariaqartitaannik tuninissaat pingaartipparput. Agguaaneq ikiuunnissamut periarfissaalluarpoq, aammali innuttaasut pillugit maaniinnitta takutinnissaanut periarfissiivoq,” Tasiumi aqutsisoq, Marthannguaq Dahl Bech oqarpoq.
Ikiuiniaqatigiiffik Hjælp Din Næste ukiorsiutinik atisanik sinnguppuuinillu katillugit 135 kiilunik oqimaassusilinnik Nuummi angerlarsimaffeqanngitsunut tunniussuutassanik nassarput, agguaanneqartut 150.000 koruuninik naleqarput, tapiissutissanillu katersuiniarneersunit akiligaallutik.
