Maria Grødem aallarnissani sioqqullugu sapaatit akunnerini marlunni napparsimasimagaluarluni mastersinut functional fitnessimi nunarsuarmi pissartanngorniunnermi 45-49-nik ukiullit akornanni sølvinnappoq.
Maria Grødem Arubami iF3 Masters World Championshipimut peqataareerluni sølvinnalluni angerlarpoq. Unammiuaarneq oktobarip 23-anniit 25-annut ingerlanneqarpoq.
Arnat 45-49-nik ukiullit unammineranni immikkoortuni arfinilinni katillugit 516 pointinnalluni peqataasut 21-t akornanni normu 2-nngorpoq. Susanne Hedberg 560 pointinnalluni ajugaavoq, Erica Sternerilu 508 pointinnalluni bronzennappoq.
Unammiuaarneq sioqqullugu piareersarnera kissaatigisamisut ingerlasimanngilaq. Maria Grødem Facebookimi allappoq aallarnissani sioqqullugu sapaatit akunnerini marlunni napparsimasimalluni. Arubamut tikikkami kiak silaannaallu isugutannera aamma unammilligassaasimapput.
– Oqitsuinnaanngilaq, tamannalu pilersaarutit malillugit tamatigut ingerlasanngilaq. Taamaattumik angusara qujamasuutigeqaara, allappoq.
Unammiuaarneq misilitsinnernik arfinilinnik imaqarpoq. Tassani qasusuissuseq, nukittussuseq, timip nammineq oqimaassusaa atorlugu sungiusarnerit, teknikikkut piginnaasat, sukkasuumik nukittuumillu iliuuseqarsinnaaneq kiisalu naggataatigut sungiusaatinik assigiinngitsunik ataatsimoortitsineq misilinneqarput.
Maria Grødem misilitsinnerni tamani pitsaanerpaat arfinillit akornanniippoq. Teknikikkut piginnaasanik misilitsinnermi normu 2-nngornini angusamini pitsaanerpaavoq. Taassuma saniatigut ataasiarluni normu 4-nngorpoq, pingasoriarluni normu 5-inngorluni ataasiarlunilu normu 6-inngorluni.
Unammilligassaqaraluarluni VM-imut peqataanini misigisaasimavoq nuannersorujussuaq. Arubami kattuffik F3ARUBA, nammineq kajumissutsiminnik sulisut tikilluaqqusinerlu nersualaarpai. Aamma ikinngutitaarnerit Fitness GymDanmarkimilu timersoqatinik naapitseqqinneq nuannaarutigai.
Facebookimi allakkamini aningaasaliisuminut Travel by Heart Greenlandimut, Deres Auto ApSimut, Modulomut, Malik Seafoodimut, Hotel Aurora in Greenlandimut Arctic Printimullu qujassuteqarpoq.
– Ilissi tapersersuinissigut aatsaat tamanna pisinnaasimavoq, Maria Grødem allappoq.
