Aqutsisoqarfimmi pisortanngortussaq Akileraartarnermut Aqutsisoqarfimmut uterpoq, tassani siornatigut ukiuni qulini immikkoortortaqarfimmi pisortaasimalluni. Piaarnerpaamik sulilissaaq.
Rita Lyberth Jensen Akileraartarnermut Aqutsisoqarfimmi pisortanngussaaq. Qitiusumik Naatsorsuuseriffimmi immikkut siunnersortitut atorfeqarnerminit nuuppoq, pisortallu ingerlatsiviini, aningaasaqarnermik aqutsinermi digitalinngorsaanermilu ukiorpassuarni misilittagaqarpoq.
2013-imiit 2023-mut Akileraartarnermut Aqutsisoqarfimmi immikkoortortaqarfimmi pisortaasimavoq, ilaatigut aningaasaqarnermut, naatsorsuutinut, akileraarutinut akitsuutinullu akisussaasuulluni.
Aningaasaqarnermut Naalakkersuisup Aqqaluaq B. Egedep suliassaqarfimmik ilisimasaqarluarnera suliassanut tunngavissatsialattut erseqqissarpaa.
»Rita Lyberth Jensenip Akileraartarnermut Aqutsisoqarfimmi pisortanngornissaa nuannaarutigaara. Akileraartarnermut tunngasunik ilisimasaqarluarpoq, pisortallu ingerlatsiviini aqutsinermik, aningaasaqarnermik aqutsinermik digitalinngorsaanermillu ukiorpassuarni misilittagaqarluni. Tamanna aqutsisoqarfiup ineriartortittuarnissaanut tunngavissaalluarpoq. Suleqatigilerumaarnissaa qilanaaraara,« tusagassiorfinnut nalunaarummi oqarpoq.
Digitalikkut aaqqiissutinik misilittagaqarpoq
Rita Lyberth Jensen 1996-imiilli pisortat ingerlatsiviini sulisimavoq, siornatigullu Qitiusumik Naatsorsuuseriffimmi allaffimmi pisortaasimalluni.
Aamma sulisitsisut nalunaarsorsimaffiannik nutaamik sulisitsisullu nalunaaruteqartarnerannut digitalikkut aaqqiissutinik ineriartortitsinermi suliniummi aqutsisuusimavoq.
Tusagassiorfinnut nalunaarut naapertorlugu aqutsinermini sinaakkutit ersarissut, akisussaassuseq oqaloqatigiinnerlu pingaartippai. Sulisut piginnaasaat suliaminnullu tunngatillugu ineriartortuarnissaat aamma aqutsinerani qitiupput.
Aqqaluaq B. Egedep erseqqissarpaa innuttaasut suliffeqarfiillu Akileraartarnermut Aqutsisoqarfimmi eqqortumik torersumillu sullinneqarnissartik tatigisinnaassagaat. Taassuma oqarnera naapertorlugu tamanna ulluinnarni ingerlatsinerup patajaatsuunissaanik sulisullu qanimut suleqatigalugit ineriartortitsiuarnissamik piumasaqaateqarpoq.
Rita Lyberth Jensen piaarnerpaamik sulilissaaq. Ulloq sulilerfissaa aalajangersimasoq nalunaarutigineqanngilaq.
