Københavnip Ilulissallu akornanni toqqaannartumik timmisartuussinerup nutaap ammarneqarnera sisamanngornermi ullaakkut Kastrupip mittarfiani oqalugiartoqarlunilu qiorsinermik malunnartinneqarpoq. Timmisartoq Ilulissanut nalunaaqutaq 13.40 mittussaasoq.
Ilulissanut ilaasut sisamanngornermi ullaakkut persuarsiornartumik aallariartorput, Kastrupip mittarfiani toqqaannartumik timmisartuussinerup nutaap ammarneqarnera nalliuttorsiutigineqarmat.
Oqalugiartunut ilaavoq Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq Iddimanngiiu Jensen Bianco. Taassuma ulloq Kalaallit Nunaannut pingaarutilittut oqaluttuarisaanermullu ilaalertussatut erseqqissaatigaa.
– Nuummi, Qaqortumi Ilulissanilu mittarfiit naammassineqarnerisigut mittarfiit pillugit suliniut ataatsimut isigalugu naammassineqarpoq. Ukiut arlallit matuma siorna politikkikkut aalajangiinerit maanna nunatta immikkoortuini assigiinngitsuni pingasuni piviusunngorlutillu naammassineqarput, Naalakkersuisut Facebookimi allagaat naapertorlugit oqarpoq.
Oqalugiartoqareernerata kingorna aappalaartumik qiorsisoqarpoq. Tamatuma kingorna ilaasut timmisartumut ikipput Ilulissanut aallarlutik, nalunaaqutaq 13.40 mittussaallutik.
Paasissutissarsiffik: Naalakkersuisut.
