Digitalitigut aaqqiissutinut, silassorissuusianut, ernisussiornermut napparsimasunillu peqataatitsinermut tunngasut Peqqissutsimut Inunnullu Innarluutilinnut Naalakkersuisup Anna Wangenheimip nunallu immikkoortuani siunnersuisoqatigiit siulittaasuata Mads Duedahlip Hjørringimi Regionshospitalimut Aalborgimilu Universitetshospitalimut pulaarneranni saqqummiussanut eqqartukkanullu ilaapput. Digitalitigut teknikkikkullu atortorissaarutitigut aaqqiissutit nunatsinni innuttaasunut iluaqutaasussamik Kalaallit Nunaanni Peqqinnissaqarfimmi ullutsinni siunissamilu qanoq atorneqarsinnaanersut pulaarneranni pingaarnertut eqqartorneqartunut ilaavoq.
Gigtimik avalluummilluunniit allamik nappaatilinnut ”digitalitigut ungasianiit nakorsiartitsisarneq”-mut digitalitigullu aaqqiissutinut tunngasut, Hjørringimi Regionshospitalimi sulisut saqqummiussaannut ilaapput. Pulaartuttaaq ernisarfimmi aamma meeqqanut inuusuttunullu immikkoortortaqarfimmi ininut malugisaatinik eqeersaaviusunut alakkaatinneqarput.
Napparsimasunik qanigisaasunillu peqataatitsinermut immikkorluinnarlu ittumik katsorsaanermut, tamatumani inorlutik inunngorsimasunik katsorsaanermut, Aalborgimi Universitetshospitalip nutaartaanut pulaarneranni pingaarnertut eqqartorneqartunut ilaapput. Napparsimmavimmittaaq tassani silassorissuusianik atuinermut, tamatumani ilaatigut ivianngikkut kræftinnguussimasinnaasunik tinuneqarneranik qinnguartaalluni misissuinermut, pinartoqartillugu nakorsiartarfimmi qinnguartaalluni assilisat tunngavigalugit naliliinermut nakorsallu nakorsiat pillugit immiussaannik qarasaasiatigut allaganngortitsisarnermut tunngasunik aamma saqqummiisoqarpoq. Ernisarfimmittaaq sulisut naartusunut nipit maligaasat atorlugit, tassa ultralydimik robotti atorlugu qinnguartaalluni qanoq misissueriaaseqarnerlutik aamma takutippaat.
”Atortorissaarutit nutaaliat digitalitigullu aaqqiissutit peqqinnissaqarfitta innuttaasunut peqqinnissakkut ungasianiit sullissinerulersinnaanissaanut iluaqutaalluarsinnaaqisut pulaarnitsinni pingaarnertut paasivara. Silassorissuusiattaaq Jyllandip avannaani qinnguartaalluni misissuinermi nappaatinillu suussusersiuinermi qanoq iluaqutigineqarlualereersimanerannut takussutissarsivunga. Tappavani ineriartortitsineq malinnaaffigeqqissaarparput, aaqqiissutigisimasaallu arlallit peqqinnissaqarfitsitulli ittumi atugassaqqippasipput”, Peqqissutsimut Inunnullu Innarluutilinnut Naalakkersuisoq, Anna Wangenheim, oqarpoq.
Pulaarnerat Kalaallit Nunaata Jyllandillu avannaani napparsimmaviit suleqatigiilernissaannut periarfissaalluarsinnaasunik eqqartueqatigiinnermik naggaserneqarpoq.
