Innuttaasut 2025-mi Suila-tapinik amerlavallaartunik pisimasut aningaasat tigummiinnarsinnaanissaat naatsorsuutigineqarsinnaavoq. Utertitsereersimasut aningaasatik utertinneqassapput. Kukkunerit annertuutigut Namminersorlutik Oqartussat namminneq IT-systemiannik pissuteqarmata, Naalakkersuisut utertitsilluni akiliisussaatitaanerit isumakkeerusuppaat.
Innuttaasunut 2025-mi Suila-tapinik amerlavallaartunik pisimasunut aningaasaqarnikkut oqilisaassinissaq aqqutissiuunneqarpoq. Naalakkersuisut taakkua akiitsui isumakkeerusuppaat, tamannalu akuerineqaqqullugu Aningaasaqarnermut Akileraartarnermullu Ataatsimiititaliamut qinnuteqarsimallutik.
Innuttaasunut tamanna isumaqarpoq aningaasat utertittussaagaluakkatik tigummiinnarsinnaassagaat. Aningaasanilli tunissutip tunuliaqutaraa pisortat ingerlatsinerat, Aningaasaqarnermut Naalakkersuisoqarfiup oqarnera naapertorlugu annertuumik kukkusumik akiliuteqarnernut nammineq pissutaasoq.
Aningaasaqarnermut Naalakkersuisup Aqqaluaq B. Egedep nassuerutigaa innuttaasut pisortanit paasissutissat tatigisinnaasimanngikkaat.
– Innuttaasutut pisortanit paasissutissat tatigisinnaasariaqarput. Matumani taamaattoqarsimanngilaq, tamannalu ajuusaarutigaarput. Innuttaasut ilaat namminneq kukkussuteqanngikkaluarlutik amerlavallaartunik tunineqarsimapput, tamannalu innuttaasup ataasiakkaap akisussaaffiginngilaa, oqarpoq.
Naalakkersuisut naapertorlugit kukkunerit innuttaasorpassuarnut pakatsinermik nalorninermillu pilersitsisimapput. Maanna Naalakkersuisut pisortat aningaasartuutinik namminneq matussusiinissaat sulissutigaat.
Innuttaasut aningaasat amerlavallaartut tigusimasatik utertereersimagaluarunikkit aamma isumakkeerinninnermit iluaquteqassapput. Taakkua aningaasatik utertinneqassapput.
– Piffissaq utertissinnaanngilarput, akisussaaffimmilli tigusisinnaavugut qulakkeerlugulu innuttaasut systemimi kukkunernut akiliisinneqannginnissaat. Tamanna maanna iliuuseqarfigaarput, Aqqaluaq B. Egede oqarpoq.
Isumakkeerinninnissaq Aningaasaqarnermut Akileraartarnermullu Ataatsimiititaliap akuersissuteqarnissaanik utaqqivoq. Akileraartarnermut Aqutsisoqarfiup ilisimatitsissutigissavaa isumakkeerinninneq qanoq ingerlanneqassanersoq, innuttaasullu iliuuseqartariaqassanersut.
