Kujalleq

Narsami Yellow September malunnartinneqarpoq

Narsami pitsaaliuisut septembarip qulinganni Yellow September malunnartinniarlugu sammisaqartitsipput. 

Yellow September imminut toqunnissamik pinaveersaartitsinermut, neriuuteqarnermut ataatsimoornermullu tunngavoq. Tamanna pillugu Narsami meeqqanut, inuusuttunut inersimasunullu assigiinngitsunik sammisassaqartitsinikkut malunnartinneqarpoq.

Oqaluffimmi qinoqatigiinneq, tussiarneq naneruutinillu ikitsineq ingerlanneqariarluni unnukkut innuttaasut pisuttuaqatigiipput. Kingorna Innuttaasut illuanni malunnartitsineq nanginneqarpoq isersimaaqatigiinnikkut, nipilersornermillu akunniliisoqartarluni. Ilaqutariit Illuanni sulisut najuupput, oqaloqatigiinnissamik tapersersuinissamillu neqerooruteqarlutik. 

Kiisalu Playmakerit meeqqanut inuusuttunullu aamma  sammisaqartitsipput.

-Aaqqissuussaq siammasissumik suleqatigiissutigisinnaagatsigu iluarpoq, taamaalilluni tamanut ataatsimoorfiusinnaalluni, pitsaaliuinermik siunnersorti Nivi Stidsen oqarpoq.

Aaqqissuussinermut atatillugu innuttaasut aamma Pilersuisumi Brugseni-milu Yellow Septemberip ilisarnaataanik aallernissaminnik periarfissinneqarput, taamaalillutik tapersersuinertik takutissinnaallugu. 

  • Naalakkersuisut Narsap napparsimmavianut pulaarput sulisussaqarnikkullu unammilligassat tusarlugit

  • Upernavimmi aalisartut aperineqartut affaasa missaat qaleralinnik ikinnerusunik takusaqartarput

  • Kalaallit Nunaanni Politiit: Kommune Kujallermi imigassamik matusigallarnerup kinguneranik meeqqat toqqissisimanerulerput