Nuuk bussinut utaqqisarfimmik nutaamik peqalerpoq. Utaqqisarfik najukkami sumiiffigisami sananeqarpoq atortussanik Nuummi toqqorsivimmiittunik atuilluni, taamaalilluni ingerlatsineq aserfallatsaaliinerlu ajornannginnerulissallutik. Utaqqisarfik maanna misilittarneqassaaq. Kingusinnerusukkut innuttaasut peqataatinneqarumaarput apeqqutinik immersuititsinermi.
Angallannermut Nakkutilliinermullu Immikkoortortaqarfiup neriuutigivaa taamanikkussamut atuisut amerlasuut misilittakkaminnik avitseqatiginnilluarumaartut, taamaalilluni aaqqiissutissaq pitsanngorsarneqarsinnaassalluni misilittakkallu bussit unittarfiinik pitsanngorsaanermut atorneqarsinnaassallutik.
”Misileraaneq iluatsilluassasoq neriuutigivarput, atuisullu pingaarutilinnik utertitsiffigilluarumaaraatigut. Tamanna utaqqisarfiit maanna piusut, aammali siunissami sananeqarsinnaasut, ineriartortinnissaanut pitsanngorsarnissaannullu iluaqutaassaaq, taamaalillutik ilaasut pisariaqartitaannut sapinngisamik naleqqunnerulissallutik.” – Angallannermut Nakkutilliinermullu Immikkoortortaqarfik, Kommuneqarfik Sermersooq.
