Nuummi ammerivik Kittat tallimanngornermi novembarip 27-ani kaffillertitsilluni ukiunik 45-nngortorsiorluni nalliuttorsiussaaq. Ullormi tassani Kittat nittartakkamik nutaamik ammaassaaq, tassani kalaallit annoraavi pillugit atuartoqarlunilu annoraaliornissamut atortussanik pisiortoqarsinnaassaaq.
Kittat novembarip 29-ani 1981-imi Nuummi ammarami, arnanut suliffissaqanngitsunut sammisaqartitsiviuvoq. Amminik mersorneq amminillu qangaaniilli periutsit malillugit suliaqarneq aallartinneraniilli suliat ilagisimavaat.
Ullumikkut Kittat kalaallit assialeriaasiinik eriaginnillunilu ineriartortitsivoq, pingaartumik kalaallit annoraavi ukkataralugit. Nuummi ammeriviup saniatigut Kittat Kapisilinni Ammiamii-mik Qeqertarsuatsiaanilu Amitsialak-mik immikkoortortaqarpoq. Immikkoortortaqarfiit pingasut qangaaniilli periutsit kinguaariinnut tulliuttunut ingerlateqqinneqarnissaat sulissutigaat.
Mersornissamut ilitsersuutit akeqanngitsut pilersaarutaapput
Nittartakkami nutaami Kittat neqeroorutai takuneqarsinnaapput, nittartakkakkullu pisiniarfimmi kalaallisuuliornissamut atortussanik pisiortoqarsinnaavoq. Kittat nittartagaq kingusinnerusukkut annertusarlugu kalaallit annoraavisa atisartaat ataasiakkaat taakkualu suliarineranni periutsit pillugit nassuiaatinik ilassuteqarniarpoq. Aamma atisat ataasiakkaat qanoq mersorneqartarnersut pillugit akeqanngitsunik ilitsersuusiornissaq pilersaarutaavoq.
– Ilisimasavut katersorlugit tamanut pissarsiarineqarsinnaatikkusuppavut, immikkoortortaqarfinnut pingasunut pisortaq Aviaq Reimer Olsen oqarpoq.
Nuummi kaffillerneq immikkut ittumillu saqqummersitsineq
Kittat sapaammi novembarip 29-ani 45-nik ukioqalerpoq, nalliuttorsiutigineqarnerali tallimanngornermi novembarip 27-ani nal. 13-imiit 17-imut pissaaq. Kikkut tamarmik Nuummi Hans Egedesvej 29-mi Kittat inaani kaffillernermut tikilluaqqusaapput. Ululinannguaq qitinnermik takutitsissaaq, René Brandt nipilersussaaq, Kukalu uaajeernermik qilaatersornermillu takutitsissaaq.
Piffissami tamatumani Nuutoqaq Lokalmuseum akeqanngitsumik pulaarneqarsinnaavoq. Tassani immikkut saqqummersitsinermi Kittat ukiuni siullerni 45-ni oqaluttuarisaanera assit, apersuinerit filmillu atorlugit oqaluttuarineqarpoq. Katersugaasiviup saqqummersitsineq Kittat suleqatigalugu suliaraa.
Nittartagaq nutaaq novembarip 27-ani ammassaaq
https://www.kittat.gl/
Nalliuttorsiuneq Facebookimi
https://www.facebook.com/share/19pFFey329/

