Atuakkiortut Kattuffiata ukiunik 50-inngortorsiorneranut atatillugu meeqqeriviit 16-it meeqqanut atuakkialerineq pillugu workshopimut peqataapput, atuakkiortoq aamma perorsaasoq Naussunguaq Lyberth peqatigalugu. Suliniut pilersinneqarpoq Atuakkiortut Kattuffiat aamma Maria Panínguak` Kjærulff, Kommuneqarfik Sermersuumi Allunnguamik ingerlatsisup suleqatigiinnerisigut.
Meeqqat nammineq eqqarsaatersuutiminnik, misigisaminnik takorluukkaminnillu oqaluttualiorlutillu titartaapput. Meeqqeriviit, Meeqqanut Atuarfeqarnermullu ingerlatsivik angajoqqaallu tapersersuilluarnerisigut Nuummi meeqqeriviit tamakkerlugit workshopimik ingerlatsisinnaaneq periarfissaalersimavoq.
Tullinnguullugu meeqqat oqaluttuaasa titartagaasalu atuakkatut saqqummersinnissaanut periarfissat misissorneqassapput. Atuakkiortut Kattuffiat suliniummut aningaasaliissutinik qinnuteqarniarpoq. Suliniutip takutippaa qanoq pilersitsisoqarsinnaatiginera kommuni, suliffeqarfiit, kulturikkut suliaqartut aamma ilaqutariit meeqqat takorluuisinnaanerisa, oqaatsitsigut aamma nutaaliorsinnaanerisa nukittorsarniarlugit suleqatigiissutigigaangamikku.
Kommuneqarfik Sermersuup Naussunguaq Lyberth, Atuakkiortut Kattuffiat, meeqqerivinni sulisut kiisalu meeqqat angajoqqaallu qujassuteqarfigai. Immaqa siunissami kalaallit atuakkiortussaannik naapitsereerpugut.
Allunnguaq Kommuneqarfik Sermersuumi ataqatigiissaarneqartumik suliniutaavoq, tamanna najukkami suliffeqarfinniit, atuarfinnut ulluuneranilu paaqqinnittarfinnut eqqumiitsuliornermik kulturikkullu neqeroorutinik katersuiffiuvoq ingerlatitseqqiiffiusartorlu. Siunertaavoq atuarfinni atuartunut meeqqerivinnilu meeqqanut pinngorartitsinermik kulturikkullu atuartitsissutinik neqerooruteqarnissaq — ilutigalugu atuarfimmi pinngorartitsinermik kulturikkullu atuartitsissutit pitsanngorsarnissaat.
