Inuusuttut, atugarissaarneq imminullu toquttarnermik pitsaaliuineq, Kalaallit Nunaanni illulioriaaseq nunasiaataanermilu oqaluttuarisaaneq, atuartitaaneq ippernallu pillugit ilisimatusarnerup sunik oqaluttuussinnaavaatigut? Ilisimatusartut tallimaallutik novembarip 13-ianni Paasisavumi ajugaaniutilerunik tamarmik immikkut minutsini tallimani ilisimaqarnerulersinniassavaatigut.
Arctic Hubip maanna qulaarsinnaalerpaa ilisimatusartut tallimat kikkut Katuap isiginnaartitsisarfianut qaqissanersut. Tassani Kimmernaq Kjeldsen ingerlatsisoralugu toqqaannartumik aallakaatitsinermi ilisimatusaatiminnik saqqummiillaqqinneqqusaatissapput.
Qinnuteqartunit 21-nit ajugaaniutivittunut 5-nut
Ukioq manna Paasisavumut peqataajumallutik qinnuteqartut 21-upput. Aalajangiisussatut toqqakkat sap. ak. kingulleq naapipput aalajangerniartussaallugu kikkut tallimat ajugaaniutivissanersut. Qinnuteqartut tamarmik ph.d.-liorsimasuupput Kalaallit Nunaanni tassungaluunniit tuungasunik ilisimatusarsimasuullutik. Paasisavumi ilisimatusaatiminnik tamatta paasisinnaasatsinnik saqqummiillaqqinneqqusaatissapput.
“Ilisimatusarneq pillugu oqaluttuanik tallimanik assigiinngilluinnaqqissaartunik tusartinneqarnissarput qamanngarujussuaq qilanaaraarput. Unnuup ataasiinnaap ingerlanerani isiginnaartut tusarnaartullu sammisanik namminneq ujartornavianngisaraluaminnik ilisimasaqarnerulissapput. Ajugaaniutivittut minutsit tallimaannaat ingerlaneranni ilisimatusaatiminnik paasinartumik, soqutiginartumik minnerunngitsumillu aliikkusersuerpalaartumik saqqummiinissaminnut periarfissaqarput,” Aviâja Rosing-Olsen, Arctic Hubip, Paasisavumik aaqqissuisuusup, allaffiani pisortaq oqarpoq.
Paasisavut 2026-imi ajugaaniutivittussat ukuupput:
- ArnâraK’ Patricia Blochip kalaallit inuusuttut imminnut toqoriaraluarnerminnink oqaluttuaat misissorsimavai paasiniarlugu inuusuttut imminnut toqoriarnissamut qanoq illersorneqarsinnaanersut atuagarissaarnerlu qanoq siuarsarneqarsinnaanersoq.
- Frederik Braünerip Kalaallit Nunaanni nutarterinerup nalaani illulioriaaseq illoqarfinnillu pilersaarusiorneq misissorsimavai paasiniarlugu Danmarkip nunasiaatilittut politikkia nunatsinni illoqarfinnut nunaqarfinnullu qanoq sunniuteqarsimanersoq.
- Hans Peder Kirkegaardip misissorsimavaa illersornissakkut pissutsit allanngorneranni kalaallit qinigaat qanoq iliornersut, taamaalilluni nunatta nunanit allanit soqutigineqaleriartornerani qinikkat inissisimaneri paasisaqarfiginerujumallugit.
- Louise Pindstrup Scaveniusip atuartut kalaaliaqqat misigisartagaat misissorsimavai paasiniarlugu atuartitsineq pædagogikkilu atuartut ilikkartarnerannik qanoq ikorfartuisinnaanersut.
- Viktor Gårdmanip ippernat Kalaallit Nunaanni pinngortitami ataqatigiinnermut pingaarutaat misissorsimavaa paasiniarlugu pinngortitamut artillu imminnut sunniivigeqatigiinnerannut ippernat qanoq pingaaruteqartiginersut.
Ilisimatusarneq alikkusersuinerlu Katuami
Ajugaaniutivittussat Katuami isiginnaartitsisarfimmut qaqigunik minutsini tallimaannarni periarfissaqarput ilisimatusaatitit pillugit isiginnaartut oqaluttuutissallugit. Paasisavulli taakkuinnaanngillat.
Kimmernaq Kjeldsen ingerlatsisuussaaq, isiginnaartullu unnuup ingerlanerani ilisimatusarnermik, unamminermik aliikkusersuinermillu misigisaqartissavai. Aalajangiisussat Ane Marie Ottosen, Nick Duelund aamma Minik Rosing inersuarmi malinnaassapput ajugaaniutivittullu saqqummiineri nalilersussallugit, naggataagullu Paasisavut 2026-imi ajugaasumik toqqaallutik. Ajugaasoq 50.000 kr-nik akissarsissaaq.
Kalaallit Nunaamiut tamarmik malinnaasinnaaniassammata KNR toqqaannartumik aallakaatitsissaaq.
Paasisavut 2026 Katuami novembarip 13-ianni malinnaaffiginiaraanni akeqanngilaq, tamassilu tikilluaqqusaavusi. Bilitsit inniminnerneqarsinnaalissapput oktobarip 1-anni paasisavut.gl-ikkut imaluunniit Arctic Hubip Facebookimi quppernerani eventinut iserluni.
Katuami toqqaannartumik nutserisoqassaaq kalaallisut qallunaatullu. KNR-ikkut aallakaatitsineq kalaallisuussaaq, KNR 2-kkullu oqaatsit Katuami atorneqartut tusaaneqarsinnaallutik.
Piviusut: Paasisavut tassaavoq Kalaallit Nunaanni ilisimatusarnermut tunngasunik unammineq Arctic Hubimit aaqqissuunneqartartoq.
- Paasisavut ukioq allortarlugu ingerlanneqartarpoq, maannamullu marloriareernikuulluni.
- Ph.-d.-liortut naammasseqqammersullu Kalaallit Nunaannut tunngasunik ilisimatusartut juunip 1-anit septembarip 1-anut ajugaaniutivinnissamut peqataajumallutik qinnuteqarsinnaasimapput. Qinnuteqartut 21-upput.
- Aalajangiisussat nunatsinni ilisimatusarnermut saqqummiinermullu tunngasunik ilisimasaqartut Arctic Hub peqatigalugu qinnuteqartunik misissuisimapput, tallimallu qanittukkut saqqummertussat toqqarlugit.
- Paasisavummi siornatigut ajugaasimasut ukuupput: Nick Duelund aamma Regine Møller.
Allaaserisami matumani imminut toquttarneq aamma imminut toqunnissamik pinaveersaartitsineq eqqartorneqarput. Oqaloqateqarnissat pisariaqartikkukku Tusaannga akeqanngitsumik kinaassutsillu isertuullugu attaveqarfigisinnaavat. Oqarasuaat, sms aamma chat ulloq unnuarlu ammasarput. 80 11 80-imut sianerit, 1899-imut sms-erit imaluunniit tusaannga.gl aqqutigalugu allagit.
