Siumut: Kommunalbestyrelsip aalajangiineri borgmesterip malittussaavai – piumasaqaataasullu piviusunngortinneqartussaallutik.
Siumup Kommune Qeqertalimmi kommunalbestyrelsimi ilaasortaanermigut apeqquserpaa, borgmesterip kommunalbestyrelsip 2026-mi 1. kvartalip naatsorsuutai pillugit aalajangiineri piumasaqaataasullu aalajangersimasut naammattumik piviusunngortissimanerai?
Inatsisartut inatsisaat nr. 29, 17. november 2017-imeersoq, Kommunit aqunneqarnerat pillugu Inatsisartut inatsisaat, § 23-mi borgmesterip pisussaaffii erseqqissumik aalajangersarneqarput.
§ 23, imm. 1 naapertorlugu borgmesteri Inatsisartut inatsisaat, kommunip aqutsinermut ileqqoreqqusaa imaluunniit suleriaasissamut maleruaqqusaq naapertorlugit suliassaminik isumaginninnissamut itigartitsippat, kommunalbestyrelsip borgmesterip tullia suliassamik pineqartumik isumaginninnissaanut peqqusinnaavaa.
§ 23, imm. 2-mi aalajangersarneqarpoq, borgmesterip suliassanik taamaattunik ingasattumik arlaleriarluniluunniit ilaginnaaneratigut, kommunalbestyrelse borgmesterimik soraarsitsinissamik aalajangiisinnaasoq.
1. kvartalimi aningaasaqarneq pillugu aalajangiineq ersarippoq
Kommune Qeqertalimmi Kommunalbestyrelsip ulloq 11. juni 2026 ataatsimiinnerani 1. kvartalip naatsorsuutai oqaluuserineqarput.
Naatsorsuutit takutippaat kommuni 1. kvartalimi 18,1 mio. kr.-inik atuivallaarsimasoq, atuinerullu procentia 112,5 %-iusoq. Aamma naatsorsuutigineqarpoq ukiup naanerani kommuni 72,2 mio. kr.-inik atuivallaarsinnaasoq.
Siumut aamma Atassut naatsorsuutit inerneri tusaatissatut tiguaat, inernerusulli akuerinagit, kommunalbestyrelsimullu ilaatigut piumasaralugu:
- 18,1 mio. kr.-inik atuivallaarnerup pinngitsoortinneqarnissaanut iliuusissatut pilersaarusiortoqassasoq,
- ataatsimiititaliat ataasiakkaat aningaasaqarnikkut iluarsaaqqinnissamut pilersaarusiussasut,
- akissarsianut aningaasartuutit pillugit immikkut nalunaarusiortoqassasoq,
- ERP-systemip aningaasaqarnikkullu paasissutissanik aqutsinerup killiffianik nalunaaruteqartoqassasoq,
- kiisalu aningaasaqarnikkut ajornartorsiutit pillugit sukumiisumik paasissutissat saqqummiunneqassasut.
Siumut aamma Atassut erseqqissumik allapput, kommunalbestyrelsip aatsaat aningaasaqarnermut nalunaarummik akuersissuteqarsinnaasoq paasissutissat aamma iliuusissatut pilersaarutit pisariaqartut saqqummiunneqareernerisigut pisinnaasoq.
Kommunalbestyrelsip piumasaqaatai 2. kvartalimi naammassineqarsimanngitsut
Maannakkut 2. kvartalip naatsorsuutai saqqummiunneqartut takutippaat aningaasaqarnikkut ajornartorsiutit sippuinerillu suli aaqqinneqarsimanngitsut.
- juni 2026-mi kommunip ingerlatsinermut aningaasartuutai katillugit 316,4 mio. kr.-upput, aammalu kommuni 28,2 mio. kr.-inik atuivallaareerpoq. Atuineq taama ingerlaannassappat ukiup naanerani 56,4 mio. kr.-inik atuinerunissaq naatsorsuutigineqarpoq.
Siumup ilanngussani erseqqissarpaa, 1. kvartalimiit 2. kvartal-imut ilisimatinneqarsimagaluarluta missingersuutit iluarsineqassasut, tamanna suli naammassineqarsimanngitsoq. Taamaattumik Siumut piumasaqarpoq missingersuutit ataatsimiititaliani tamani iluarsaateqqinneqassasut aammalu aaqqissuussaanerup nutaap pisariaqartitaanut naleqqussarneqassasut.
Aammattaaq 2. kvartalimi suli atuinerujussuaqarpoq:
- Isumaginninnermut tunngasuni 15,2 mio. kr.-inik atuineruneq,
- TIMI TARNI-mi 8,4 mio. kr.-inik atuineruneq,
- INOQARFIK-mi 9,6 mio. kr.-inik atuineruneq,
- Aasianni 21,9 mio. kr.-inik atuineruneq, ukiullu naanerani 43,8 mio. kr.-inik atuinerunissaq naatsorsuutigineqarluni.
Apeqqut tassaavoq: Kommunalbestyrelsip aalajangiinera sooq atuutsinneqanngila?
Siumup isiginninnera malillugu apeqqut pingaarnerpaaq tassaavoq:
Kommunalbestyrelsip 11. juni 2026 aalajangiinerisa kingorna piumasaqaatit qanoq annertutigisumik piviusunngortinneqarsimappat?
Kommunalbestyrelsip piumasaqaatai ersaripput. 1. kvartalip kingorna iliuusissatut pilersaarutit, aningaasaqarnikkut iluarsaaqqinnissamut pilersaarutit, ERP-systemip killiffia, akissarsianut aningaasartuutit pillugit paasissutissat aammalu aningaasaqarnikkut ajornartorsiutit pillugit sukumiisumik nassuiaatit saqqummiunneqarnissaat piumasaqaataapput.
Kisianni 2. kvartalip naatsorsuutaasa suli takutippaat kommunip aningaasaqarnera annertuumik tatineqartoq. Naatsorsuutit aamma oqaatigaat kommunip aaqqissuussaanerata allanngornerata kingorna atuinermut missingersuutinullu tunngasut suli tamakkiisumik inissinneqarsimanngitsut, naatsorsuutigineqarlunilu aatsaat 3. kvartalip naanerani pissutsit pitsaanerusumik inissinneqassasut.
