Aningaasaliissutit suugaluit Kujataani ineriartornermik periarfissanillu pilersitsisinnaasut tikilluaqqusaanerat Kommune Kujalleq sinnerlugu oqaatigerusuppara.
EU-p, Nunatta, Danmarkillu suleqatigiinnerannik nukittorsaaneq ippassaq nalunaarutigineqartoq, kiisalu aningaasaliissutit 200 mio. eurot takussutissaalluarput Nunatta, periarfissallu tassani ittut, avataaniit qanoq soqutigineqarnerannik. Aningaasaliiviginiakkat amerlapput, nukissiutinit aatsitassarsiornermut, ilinniartitaanermut, takornariartitsinermut, aalisarnermut qarasaasiatigullu attaveqaasersornermut.
Isumalluarnarput. Kisianni Ineriartorneq taakku malitsissaat piareersimaffigisariaqarparput.
Kujataani ineriartorneq siornagut takuneqarsimanngitsoq ornipparput. Siunissaq aatsitassarsiornerup toqqaannartumik toqqaannanngitsumillu tusindtilinnik sulliffissaqartiffia ornipparput, imaalluarsinnaavormi aatsitassarsiorfiit kujataani pingasunngortut.
Tamanna piviusunngussappat aatsitassarsiorfiit imminni naammannavianngillat.
Nukissiorfiit amerlanerusut pisariaqartissavavut. Attaveqaasersuutit inuiaqatigiinnullu iluaqusersuutit kiisalu qarasaasiakkut attaveqaatit pitsaanerusut pisariaqartippavut. Innuttaaqativut maanim suliffissarpassuanngortunik tigusilluassagunik ilinniartariaqarput piginnaanngorsartariaqarlutillu. Minnerunngitsumillu aamma angerlarsimaffinnik pisariaqartitsissaagut.
Inuit Kujataa suliffissatut, nunassatut qitornamillu perorfissaattut toqqassappassuk taava eqqortunik atugassaqartitsisariaqarpugut.
Taamaammat nuannaarutigilluinnarpara ineqarneq suleqatigiinnermi nutaami ilanngullugu eqqarsaatigineqarsimammat. Ineriartussagutta sulisut pisariaqartitavut suliartorumallersissagutsigit, maanilu suliinnassappata, angerlarsimaffiit pinngitsoorneqarsinnaanngilluinnarput.
Ineriartornerulli maanimiooreersunut iluaqutaanissaa aamma qularnaagassaraarput.
Kommune Kujallermi isumagisassavut tassaapput inuussutissarsiutitigut ineriartorneq, ilinniarneq, angerlarsimaffiit, paaqqinniffiit, atuarfiit, napparsimaveqarfiit, attaveqaasersuutit, kiisalu nunaqqatigiit nukittuut ataqatigiilersissallugit.
Arlaannattaluunniit ajutoornissaa tamatta kissaatiginngilarput, taamaammat aningaasaliinernut ersissanngilagut.
Ilungersorluta anguniagaqartariaqarpugut, akisussaassuseqarluta kiisalu piumasaqarnissatsinnut ajukkunnata, taamaapppammi aatsaat aningaasaliissutit Nunatsinnut, minnerunngitsummillu inoqarfinnut ineriartorfiusumiittunut, qaqugumut iluaqutaajumaarput.
Kommune Kujallermi oqaloqatigiinnissamut piareersimavugut.
Pitsaasumik suleqatigerusuppavut Naalakkersuisut, Danmark, EU, suliffeqarfiillu Kujataani aningaasaliuumasut.
Kina tikiuteqqaarnersoq uannut apeqqutaanngilaq.
Apeqqulli unaavoq: Ataatsimoorlutaana kinguaassavut sunik qimatsiviginiarivut.
Malene Vahl Rasmussen,
Kommune Kujallermi borgmesteri.
