Avatangiisinut, Pinngortitamut, Nukissiuuteqarnermut Ilisimatusarnermullu Naalakkersuisoq, Jørgen ”Juulut” Rosbach, Silap pissusianut, Nukissiuteqarnermut, Pilersuinermullu Ministeri Samira Nawa ataatsimeeqatigilluarpaa.
Naalakkersuisup ministerilu ataatsimiinnerat ilassinerallu siullersaraat. Ataatsimiinnermi nukissiuuteqarnermi pilersuinermut qanimut oqaloqatigiinnissaq, kiisalu silap pissusia pillugu nunani tamalaani isumaqatiginninniarnissat COP 31-mi ingerlanneqartussat oqaloqatigiissutigineqarput. Naalakkersuisup ministerilu eqqagassalerinerup tungaatigut suleqatigiinnerup annertusarneqarnissaa aamma eqqartorpaat.
”Samira Nawalu inussiarnersumik ataatsimeeqateqarnerput nuannaarutigaara. Politikkikkut akisussaaffigisavut arlalitsigut imminnut assigiiffeqarput, nuannaarutigaaralu siunissami ataatsimoorussanik soqutigisaqaqatigiilluta, anguniaqatigiittussaagatta, suleqatigiissutigisinnaasatsinnik,” Juulut oqarpoq.
Eqqaavilerinermut qanimut suleqatigiinnerunissaq
Eqqagassalerineq ataatsimiinnermi qitiulluinnartumik sammineqarpoq, tassani Kalaallit Nunaat ukiuni arlalinni pimoorussamik suliniuteqarsimanera pitsanngorsarneqarnissaat suliniuteqarfigineqarnikuuvoq.
”Ullumikkut marlunnik eqqagassanik ikuallaaveqarpugut oqartussanit akuerisaasunik, tassanilu pujoorfiit gassiat avatangiisinut peqqissutsimullu innarliinnginnerusunik aniatitsisarput. Nunatsinni sumiiffiit arlallit suli annertuumik unammillernartuniipput – ingammik nunaqarfinni soorlu eqqagassanik assartuussinermi, eqqagassanillu passussinermi, illersorneqarsinnaasumik suleriuuseqarnissamut avatangiiseqarnissami qulakkeerinninnissaq” Juulut nassuiaavoq.
aalakkersuisoq ministerilu isumaqatigiipput eqqagassalerinermi suleqatigiinnerup nukittorsarneqassasoq. Tamanna tunngavigalugu Kalaallit Nunaata Danmarkillu akornanni ataatsimoorussamik suliniuteqartussamik suleqatigiissitamik pilersitsisoqassasoq aalajangiunneqarpoq. Suleqatigiissitassap nunatsinni eqqagassalerinermi unammillernartortai misissussavaat, misilittakkanik paarlaasseqatigiittoqassaaq kiisalu tapiissuteqarfigineqarsinnaasunik nunatsinni tulluartunik periarfissaasunik misissuisoqassaaq.
