Arfininngornerup unnukkuani unnuaaneranilu Kommune Kujallermi borgmesteri, Malene Vahl Rasmussen, Qaqortumi politiit nakkutilliillutik angalaarnerannut peqataavoq nammineerluni pissutsit illoqarfimmi politiit naapittagaat timitarsiumallugit paasisimaqarfigilerumallugillu.
Illoqarfimmi pisartunik politiit nalunaarusiaat ilisimatitsissutillu borgmesterip ulluinnarni atuartarpai. Arfininngornerulli unnukkuani politiit nalunaarusiaat politiit biiliini inissamik taarserneqarput.
Taamaaliornermini politiit atugaannik annerusumik paasisaqarnerorusuppoq, aamma ajornartorsiutinik pisartunut politiit nalunaarusiaanni oqaluttuarineqartunut pissutaasartut qanimut takorusullugit.
-Pisartut atuaannarlugit tusartannginnissaat uannut pingaaruteqarpoq. Piviusulli politiit aqqusaagaat uanga nammineq takullugillu misigerusuppakka. Nakkutilliinermut peqataanikkut politiit suliaat, aamma inuit pisartullu allatorujussuaq isikkoqalersarput, borgmesteri Malene Vahl Rasmussen oqarpoq
Nakkutilliinermi politiit suliaannut borgmesteri malinnaavoq nalinginnaasumillu pigaartuutillutik politiit suliarisartagaat paasisaqarfigalugit.
Tamatuma peqatigisaanik ajornartorsiutit inuit atugaat pingaarutilimmik paasisaqarfigineqarput – taakkunanilu kommune oqartussaqarfiillu qanimut aaqqiissusiorniarlutik suleqateqatigiinnerusariaqarsinnaapput.
Borgmesteri Politiit sulissuarnerannut qujamasuppoq
Kujataani kommunip politiillu qanimut suleqatigiinnerat ilanngullugu borgmesterip erseqqissarpaa.
-Pingaaruteqarmat politiinik qanimut suleqateqarpugut, pulitiit ullut tamarluinnaasa innuttaasunik sullissineranni suliaat qujamasuutigisarpakka. Atorfissaqartinneqaraangamik takkuttarput, amerlasoorpassuartigullu pisut ilungersunaqisut suliarisariaqartarlugit. Annertuumik qutsavissaraagut, Malene Vahl Rasmussen oqarpoq.
Borgmesteri isumaqarpoq kommunip politiinik qanimut oqaloqateqartarnissaa pingaaruteqartoq, tassami politiit ulluinnarni suliaatigut inuiaqatigiit sukkut suliniarfigisariaqarnersut kommunimi pingaarutilimmik ilisimasaqalertarmat.
-Politiit angalaarlutik sulinerminni nalaattagaat sutigut suliniartariaqarnitsinnik tikkuussisinnaapput. Innuttaasummi toqqissisimanermik atukkanillu pitsaanerusunik tunissagutsigit ajornartorsiutit piviusumik qanimut paasisariaqarpavut. Taamaammat nakkutilliineq taama ittoq malinnaavigissallugu uannut pingaaruteqarpoq, Malene Vahl Rasmussen oqaluttuarpoq.
Illoqarfimmi angalaarneq politiinut pulaarnerinnaanngilaq, najukkamili ajornartorsiutinik paasinnikkumalluni kommunip ingerlaartumik sulinerannut ilaavoq, kiisalu oqartussanut allanut suleqateqarnermik nukittorsaaviulluni.
Borgmesterip erseqqissarpaa inuiaqatigiit toqqissisimassappata taava kommune, politiit, najukkamilu attuumassuteqartut allat qanimut suleqatigiittariaqarnerat, pisullu piffippiaani tikinnissaannut piumassuseqartoqartariaqartoq.
